: वीरगन्जमा रहेको देशकै दोस्रो ठूलो नारायणी रंगशालाको मर्मत तथा पुनर्निर्माणको काम सुरु भएको छ। जेनजी आन्दोलन अघिको कांग्रेस–एमाले गठबन्धनको सरकारले चालू आर्थिक वर्ष २०८२/८३ को बजेटमा नारायणी रंगशालाको पुनर्निर्माणका लागि ४ करोड रुपैयाँ बजेट विनियोजन गरेको थियो। त्यहि बजेट हाल निकासा भइ आएको र बिहीबारदेखि रंगशाला पुनर्निर्माणको काम सुरु गरिएको पर्सा जिल्ला खेलकुद विकास समितिका अध्यक्ष दीपक कुमार कानुले जानकारी दिए।
साहका अनुसार बिहीबारदेखि रंगशलाका जीर्ण प्याराफिटहरु डोजर लगाएर भत्काउन थालिएको छ। पहिलो चरणमा जीर्ण प्याराफिटहरु भत्काएर नयाँ प्याराफिट निर्माण गर्ने योजना रहेको साहले सुनाए। उनले भने,‘कांग्रेसका तत्कालिन कानुनमन्त्री अजय चौरसियाको अगैसरतमा तत्कालिन खेलकुदममन्त्री तेजुलाल चौधरीले बजेटमा नारायणी रंगशालाका लागि ४ करोड रुपैयाँ बजेट हाल्न लगाउनु भएको थियो। त्यो बजेट हाल निकासा भएर आएपछि आजदेख काम सुरु गरेका हौं। मर्मत सम्भारको अभावमा वर्षौदेखि जीर्ण अवस्थामा रहेको नारायणी रंगशाला मर्मत तथा पुनर्निर्माणका लागि चार करोड रुपैयाँले मात्रै नपुग्ने भन्दै साहले भने,‘अहिले प्राप्त रकमबाट नयाँ प्याराफिट बनाउने काम गर्छौ, ‘बाँकी कामका लागि अपुग रकम सरकारसँग माग गर्छौ। ’
प्याराफिटको काम सकिएपछि थप बजेटका लागि नेपाल सरकार र युवा तथा खेलकुद मन्त्रालयलाई फेरि गुहार्ने उनले बताए। यसका अतिरिक्त मधेस प्रदेश सरकारले पनि चालु आर्थिक वर्षको नीति तथा कार्यक्रममा नारायणी रंगशालालाई अन्तर्राष्ट्रिय स्तरको रंगशालामा स्तरोन्नति गर्ने उल्लेख गरेकाले मधेस सरकारसँग पनि आफूहरूले थप बजेटका लागि पहल गर्ने उनले बताए।
काठमाडौंको दशरथ रंगशालापछिको दोस्रो ठूलो वीरगन्जको नारायणी रंगशाला (३५ हजार दर्शक क्षमताको ) जीर्ण भइरहँदा पनि मर्मत र पुनर्निर्माणका लागि तीनै तहका सरकारले प्राथमिकतामा राखेका थिएनन्। यहाँका खेलप्रेमी र खेलाडीहरुले रंगशाला मर्मत तथा पुर्न निर्माणका लागि करिब एक दशकदेखि विभिन्न दबाबमुलक आन्दोलन पनि गर्दै आएका थिए। संघीय र प्रदेश संसद बैठकमा यस क्षेत्रका जनप्रतिनिधिले नारायणी रंगशालाको पुनर्निर्माणका लागि पटक पटक आवाजपनि उठाउँदै आएका थिए।
तत्कालीन अञ्चलाधीश लक्ष्यबहादुर गुरुङको पहलमा २०३८ सालमा १७ बिघा १० कट्ठा जग्गा फुटबल, क्रिकेट र कवर्ड हल निर्माणका लागि खरिद र अधिग्रहण गरिएको थियो। २०४२ सालमा निर्माण भएको नारायणी रंगशालाको उद्घाटन तत्कालीन राजा वीरेन्द्र शाहले गरेका थिए। यो रंगशलामा करिब डेढ दशक अघिसम्म राष्ट्रिय स्तरका विभिन्न खेलकुद प्रतियोगिता आयोजना हुँदै आएको थियो। तर मर्मत सम्भारको अभावमा रंगशाला जीर्ण हुँदै गएपछि यहाँ कुनै पनि खेलकुद प्रतियोगिता हुन सकेको छैन।
