: नेपाली पुरुष राष्ट्रिय फुटबल टोलीको प्रमुख प्रशिक्षकमा गुल्लीएल्मो एरेना नियुक्त भएका छन्। अखिल नेपाल फुटबल संघ (एन्फा) र उनीबीच बिहिबार सादोबाटोस्थित एन्फा कम्प्लेक्समा सम्झौता हस्ताक्षर भएको हो। एरेना र एन्फाबीच एक वर्षको सम्झौता भएको छ।
इटाली र स्विट्जरल्यान्ड दुई देशको नागरिकता प्राप्त ५२ वर्षीय एरेनाले अन्तिमपटक मोरक्कोको क्लब एमएएस फेश सम्हालेका थिए।
उनले यसअघि लाओसको यू२३ टिमको प्रमुख प्रशिक्षकको जिम्मेवारी सम्हालि सकेका छन्। यस बाहेक उनले जाम्बिया र मोरक्को लगायत विभिन्न देशको लिगमा काम गरेको अनुभव छ। नेपाली पुरुष टिमका अस्ट्रेलियन प्रशिक्षक म्याट रसले गत कात्तिकमा राजीनामा दिएपछि खाली रहेको राष्ट्रिय पुरुष फुटबल टिमको प्रशिक्षकको जिम्मेवारी अब एरेनाले सम्हाल्ने भएका छन्।
प्रो लाइसेन्स प्राप्त प्रशिक्षक एरिनाले नेपाल र हङकङ बीचको मैत्रीपूर्ण खेलबाट नेपाली राष्ट्रिय टिमसँग डेब्यु गर्नेछन्। यो खेल चैत १२ गते दशरथ रंगशालामा हुनेछ। यसपछि नेपालले एएफसी एसियन कप छनोटको तेस्रो चरणको अन्तिम खेल लाओस विरुद्ध खेल्नेछ।
