: एन्फा राष्ट्रिय लिग २० ८२ अन्तर्गत आज भएका तीन खेलमा चर्च ब्वाइज युनाइटेड, संकटा क्लब र एपीएफ क्लबले जित दर्ता गरेका छन्।
पहिलो खेलमा चर्च ब्वाइज युनाइटेडले काँक्रेविहारलाई हराएको थियो। दोस्रो खेलमा संकटा क्लबले श्री भगवती क्लबमाथि जित निकाल्यो। तेस्रो खेल विभागीय डर्बीको थियो। जसमा एपीएफ क्लबले त्रिभुवन आर्मी क्लबमाथि जित दर्ता गरेको हो।
सातदोबाटो स्थित एन्फा कम्प्लेक्समा भएको आजको पहिलो खेलमा चर्च ब्वाइज युनाइटेडले काँक्रेविहार क्लबलाई २-१ ले पराजित गरेको हो। पहिलो हाफमा २-० को अग्रता लिएको चर्च ब्वाइज युनाइटेडले दोस्रो हाफमा एक गोल बेहोर्यो।
खेलको सातौँ मिनेटमा रिचार्ड विल्सनले गोल गर्दै चर्च ब्वाइज युनाइटेडलाई १-० को अग्रता दिलाए। ३९ औं मिनेटमा रिचार्डले व्यक्तिगत र टिमका लागि पनि दोस्रो गोल गरे। दोस्रो हाफमा काँक्रेबिहार क्लबका लागि सुदेन विक्रम विश्वकर्माले खेलको ६६ औँ मिनेटमा सान्त्वना गोल फर्काए।
आजको दोस्रो खेल दशरथ रंगशालामा भएको थियो। जसमा संकटा क्लबले श्री भगवती क्लबमाथि कठिन जित दर्ता गर्यो। संकटा क्लबले श्री भगवतीलाई १-० ले पराजित गरेको हो। पहिलो हाफ गोल रहित बराबर बराबरीमा सकिँदा दोस्रो हाफको ६९ औं मिनेटमा संकटा क्लबका लागि कृष्णबहादुर आलेले निर्णायक गोल गरे।
आजको तेस्रो खेलमा विभागीय डर्बी भिडेका थिए। एपीएफ क्लब र त्रिभुवन आर्मी क्लब बीच भएको खेलमा एपीएफले आर्मीमाथि १-० को जित निकालेको हो। त्रिपुरेश्वरस्थित दशरथ रंगशालामा भएको यो खेलको पहिलो हाफ गोल रहित बराबरी भएको थियो।
दोस्रो हाफको ७५ औँ मिनेटमा एपीएफका सबिन गुरुङले गोल गरे। यही गोल नै निर्णायक गोल बन्यो। यो जितसँगै एपीएफले लिगमा १० खेल सहित २४ अंक जोडेको छ। मछिन्द्र क्लब र चर्च ब्वाइज युनाइटेड भने २२ अंकसहित एपीएफलाई पछाइरहेका छन्। आर्मीलाई हराएसँगै एपीएफ पुनः शीर्ष स्थानमा उक्लिएको छ।
