: इराकको पश्चिमी आकाशमा अमेरिकी सेनाको एउटा इन्धनवाहक विमान दुर्घटनाग्रस्त भएको छ। इरानविरूद्ध अमेरिका-इजरायलको संयुक्त सैन्य कारबाहीमा प्रयोग भइरहेको केसी-१३५ विमान बिहीबार पश्चिमी इराकको मरूभूमी क्षेत्रमा खसेको हो।
अमेरिकी सेन्ट्रल कमाण्डका अनुसार यो दुर्घटना कुनै बाह्य शत्रुको आक्रमण वा 'फ्रेन्डली फायर' (आफ्नै सेनाको प्रहार) का कारण नभएको स्पष्ट पारिएको छ।
इरान विरुद्धको अमेरिकी सैन्य अभियान 'अपरेशन एपिक फ्युरी' अन्तर्गत उडान भरिरहेका दुई विमानमध्ये एउटा दुर्घटनामा परेको हो। दोस्रो विमान भने सुरक्षित रूपमा अवतरण भएको अमेरिकी रक्षा मन्त्रालय (पेन्टागन) ले जनाएको छ। दुर्घटना मित्रवत वायुक्षेत्रमा भएकाले तत्कालै उद्धार कार्य सुरु गरिएको थियो।
सीएनएनले उल्लेख गरेअनुसार दुर्घटनाग्रस्त विमानमा कम्तीमा ५ जना चालक दलका सदस्यहरू सवार रहेको बताइएकाे छ । उनीहरूको अवस्थाबारे हालसम्म कुनै आधिकारिक जानकारी सार्वजनिक गरिएको छैन। पेन्टागनले पीडित परिवारहरूलाई जानकारी दिन केही समय लाग्ने भन्दै धैर्य गर्न आग्रह गरेको छ।
दुर्घटनामा परेको केसी-१३५ विमान मुख्यतया आकाशमै रहेका अन्य लडाकु विमानहरूमा इन्धन भर्नका लागि प्रयोग गरिन्छ। यस्तो विमानमा सामान्यतया पाइलट, सह-पायलट र बुम अपरेटर (इन्धन भर्ने प्राविधिक) सहित ३ देखि ४ जनाको टोली हुने भए पनि यस मिसनमा ५ जना सवार रहेको बताइएको छ।
यसअघि गत हप्ता मात्र कुवेतको आकाशमा 'मिसटेक फ्रेन्डली फायर' का कारण तीनवटा अमेरिकी एफ-१५ लडाकु विमानहरू खसेका थिए। यद्यपि, उक्त घटनामा सबै ६ जना चालक दलका सदस्यहरू सुरक्षित रूपमा बाहिर निस्कन सफल भएका थिए। अहिलेको घटनालाई लिएर थप अनुसन्धान भइरहेको सेन्ट्रल कमाण्डले जनाएको छ।
