— नेपाली क्रिकेट खेलाडीले ट्वान्टी–२० विश्वकप क्रिकेटमा प्रतिस्पर्धा गरेबापत २ लाख ५६ हजार १ सय ५४ डलर पुरस्कार राशि पाउने भएका छन् । अन्तर्राष्ट्रिय क्रिकेट परिषद् (आईसीसी)ले बुधबार विश्वकप खेले बापत खेलाडीले पाउने रकम टुंगो लगाएको हो ।
प्रतियोगितामा सहभागिता भएबापत एउटा टोलीले कम्तीमा २ लाख २५ हजार डलर पाउने तय थियो । नेपालले एक खेल जितेका हुनाले ३१ हजार डलरभन्दा बढी थप रकम पाएको हो । तेस्रो पटक विश्वकप खेल्ने क्रममा पहिलो ३ खेलमा इंग्ल्यान्ड, इटाली, वेस्ट इन्डिजसँग पराजित नेपालले अन्तिम खेलमा स्कटल्यान्डलाई ७ विकेटले पराजित गरेको थियो ।
आईसीसीका अनुसार प्रत्येक खेलको जितमा बोनस रकम राखिएको थियो भने समूहचरण, सुपर एट, सेमिफाइनल र फाइनल खेलेको टोलीलाई यसअघि नै निश्चित पुरस्कार रकम तोकिएको थियो । त्यसैको आधार मानेर कर काटेर पुरस्कार रकम प्रदान गरिने आईसीसीले जनाएको छ ।
नेपालसहित इटाली, नेदरल्यान्ड्स र यूएईले समान २ लाख ५६ हजार १ सय ५४ डलर पाउने भएका छन् । इटालीले एकमात्र विजय हात पार्नेक्रममा नेपाललाई १० विकेटले पराजित गरेको थियो । प्रतियोगितामा एउटै खेल जित्न नसकेको क्यानडा, नामिबिया र ओमानका खेलाडीको भागमा २ लाख २५ हजार डलर पुरस्कार राशि रहेको छ ।
न्युजिल्यान्डलाई फाइनलमा ९६ रनले पराजित गरी कीर्तिमानी तेस्रो पटक उपाधि जितेको भारतीय क्रिकेट खेलाडीले २६ लाख ३९ हजार ४ सय २३ डलर पाउने भएका छन् । दोस्रो पटक फाइलन खेलेका न्युजिल्यान्डका खेलाडीले १४ लाख २२ हजार ६ सय ९२ डलर पाउने भएका छन् ।
आईसीसीका अनुसार विश्वकपमा सहभागिता २० टोलीका खेलाडीलाई कुल १ करोड १२ लाख ५० हजार डलर पुरस्कार रकम प्रदान गर्न लागिएको हो । १० लाख पुरस्कार थाप्नेमा सेमिफाइनल पुगेको दक्षिण अफ्रिका रहेको छ । सेमिफाइनलमा न्युजिल्यान्डसँग पराजित दक्षिण अफ्रिकाले १० लाख ५ हजार ५ सय ७७ डलर पाउने छ । भारतसँग सेमिफाइनलमा पराजित इंग्ल्यान्डले ९ लाख ७४ हजार ४ सय २३ डलर पाउने छ ।
वेस्ट इन्डिजले ५ लाख ३८ हजार २ सय ६९ र पाकिस्तानले ५ लाख २२ हजार ६ सय ९२ डलर पाउने छ । चम्किलो प्रदर्शन गरेको जिम्बावेका खेलाडीले अस्ट्रेलियाका खेलाडीले भन्दा बढी पुरस्कार रकम पाउने भएका छन् । जिम्बावेका खेलाडीले ४ लाख ९१ हजार ५ सय ३८ डलर पाउने छन् ।
सुपर एट खेलेका टोलीमा श्रीलंकाले ४ लाख ७५ हजार ९ सय ६२ पाउने छ । समूहचरणबाटै बाहिरिएको अस्ट्रेलिया, अफगानिस्तान र अमेरिकाका खेलाडीले समान ३ लाख ९ हजार ८ सय ८ डलर, स्कटल्यान्डले २ लाख ७८ हजार ६ सय ५४, आयरल्यान्डले २ लाख ७१ हजार ७ सय ३१ डलर पाउने छन् ।
