— निर्वाचन आयोगले प्रत्यक्षतर्फ देशभरै नतिजा र समानुपातिक तर्फपनि अन्तिमतिर पुगेपछि निर्वाचन प्रक्रियासँग जोडिएका इकाइहरु बन्द गर्ने निर्णय गरेको छ ।
फागुन २१ सम्पन्न प्रतिनिधिसभा सदस्य निर्वाचन, २०८२ लाई लक्षित स्थापना गरेका विभिन्न इकाईहरू बन्द गरिएको आयोगले प्रेस विज्ञप्ति जारी गरेर जानकारी दिएको छ । निर्वाचनको समग्र व्यवस्थापन, सूचना प्रवाह, समन्वय तथा सेवा प्रवाहलाई प्रभावकारी बनाउन आयोगले विभिन्न विशेष इकाई तथा समन्वय केन्द्रहरू स्थापना गरेको थियो ।
सूचनाको प्रभावकारी सम्प्रेषण, सरोकारवाला निकायबीच समन्वय तथा मतदाता र सर्वसाधारणलाई आवश्यक जानकारी दिन आयोगले २०८२ पुस ११ गतेदेखि निर्वाचन सूचना सम्प्रेषण तथा समन्वय केन्द्र स्थापना गरेको थियो ।
त्यस्तै, मतदाता र आम सर्वसाधारणका निर्वाचनसँग सम्बन्धित जिज्ञासा सम्बोधनका लागि २०८२ माघ ५ गतेदेखि कल सेन्टर र सुरक्षा निकायबीच सहकार्य तथा निर्वाचन प्रक्रियाको समग्र समन्वयका लागि २०८२ माघ ११ गतेदेखि संयुक्त निर्वाचन सञ्चालन केन्द्र सञ्चालनमा ल्याइएको थियो ।
फागुन २६ को निर्णय अनुसार २७ देखि लागू हुनेगरी बन्द गरिएको आयोगको विज्ञप्तिमा उल्लेख छ ।
इकाईहरू सञ्चालन अवधिभर निर्वाचन सूचना सम्प्रेषण तथा समन्वय केन्द्र मातहतको सूचना सदाचार प्रवर्धन इकाईले निर्वाचनसम्बन्धी ९९८ हानिकारक सूचना पहिचान र विश्लेषण गरी सम्बन्धित नियामक निकायमा पठाएको आयोगले जनाएको छ ।
यस्तै, केन्द्र मातहतकै विद्युतीय मतदाता शिक्षा इकाईले निर्वाचन प्रक्रिया, मतदाता शिक्षा तथा निर्वाचन सचेतनासम्बन्धी भिडिओ र पोस्टर गरी ७०४ वटा सामग्री निर्माण गरी आयोगको डिजिटल प्लेटफर्मबाट प्रकाशन तथा प्रसारण गरेको पनि जनाएको छ ।
यस्तै, प्रेस अफिसले आयोगका काम कारबाहीको सूचना प्रवाह, सञ्चार माध्यमसँगको समन्वय र प्रेस ब्रिफिङ, दैनिक पत्रपत्रिकाका सामग्री विश्लेषण, आचारसंहिता विपरीतका सामग्री पहिचान र कारबाहीका लागि सिफारिस तथा मतदाता शिक्षाका सामग्री निर्माण गरेको छ ।
साथै कल सेन्टरले मतदाता नामावली, मतदाता शिक्षा, निर्वाचन आचारसंहिता तथा निर्वाचन प्रक्रियाका अन्य विषयसमेत गरी आम मतदाताका ८ हजार २२० जिज्ञासाको सम्बोधन गरेको आयोगले जनाएको छ ।
