: नवलपुरमा आगामी फाल्गुन २९ गतेदेखि जापानिज इन्सेफलाइटिस विरुद्धको बृहत् खोप अभियान सञ्चालन हुने भएको छ।
प्रदेश स्वास्थ्य कार्यालय नवलपुरले जिल्लाका ८ वटै स्थानीय तहमा एकैसाथ अभियान सुरु गरी करिब १ लाख ५० हजार नागरिकलाई खोप लगाउने लक्ष्य राखेको कार्यालय प्रमुख केशब चापागाईंले बताए।
हाल देशभरिका ७७ जिल्लामध्ये नवलपुरमा मात्र यो विशेष अभियान सञ्चालन हुन लागेको उनको भनाइ छ। ३५ वर्षभन्दा माथिका सबै उमेर समूहका नागरिकलाई लक्षित गरिएको यो खोप अभियान चैत ५ गतेसम्म सञ्चालन हुनेछ।
३५ वर्ष माथिका सबै नागरिकलाई यो खोप निःशुल्क प्रदान गरिने उनले बताए। एक पटक खोप लगाएपछि यसले दीर्घकालीन सुरक्षा दिने भएकाले फागुन २९ देखि ५ गतेसम्म सञ्चालन हुने शिविरमा पुगेर खोप लगाउन उनले लक्षित समूहलाई आग्रह गरे। नवलपुर जिल्लामा सन् २०२२ यता यो रोगका कारण १२ जनाको ज्यान गइसकेको छ भने ३८ जना संक्रमित भेटिएका छन्।
