— पूर्वसंघीय मन्त्री एवं लुम्बिनी प्रदेशका पूर्वमुख्यमन्त्रीसहित दाङमा ५१ जनाको धरौटी जफत भएको छ । जिल्लामा तीन निर्वाचन क्षेत्रमा ६० उम्मेदवार रहेकामा ९ जनाको मात्र १० प्रतिशतभन्दा बढी मत कटेको छ । अन्य ५१ जनाको धरौटी जफत भएको लुम्बिनी प्रदेश निर्वाचन कार्यालय दाङले जानकारी दिएको छ ।
क्षेत्र नं १ मा १४ जनामध्ये दुई जनाले मात्रै १० प्रतिशत मत कटाएका छन् । विजयी भएका राष्ट्रिय स्वतन्त्र पार्टीका उम्मेदवार देवराज पाठक र कांग्रेसका सहमहामन्त्री योगेन्द्र चौधरीले मात्रै जमानत बचाएका छन् ।
नेपाली कम्युनिष्ट पार्टीबाट उम्मेदवार बनेका पूर्वसहरी विकास मन्त्री मेटमणी चौधरी र स्वतन्त्र उम्मेदवारी दिएका लुम्बिनी प्रदेशका पूर्वमुख्यमन्त्री कुलप्रसाद केसीको समेत धरौटी जफत भएको छ । चौधरी यही क्षेत्रबाट २०७४ र २०७९ मा समेत सांसद् निर्वाचित भएका थिए । एमाले उम्मेदवार रेवतीरमण शर्माको पनि धरौटी जफत भएको छ ।
क्षेत्र नं २ मा २३ जनामध्ये तीन जनाले मात्रै १० प्रतिशत मत कटाएका छन् । विजयी राष्ट्रिय स्वतन्त्र पार्टीका विपिनकुमार आचार्य, एमाले महासचिव शंकर पोख्रेल र कांग्रेस उम्मेदवार किरणकिशोर घिमिरेले मात्रै जमानत बचाएका छन् । नेकपाका उम्मेदवार निर्मल आचार्यसहित अन्य उम्मेदवारको धरौटी जफत भएको छ ।
क्षेत्र नं ३ मा २३ जनामध्ये चार जनाले १० प्रतिशत मत कटाएका छन् । निर्वाचित राष्ट्रिय स्वतन्त्र पार्टीका कमल सुवेदी, कांग्रेसका दीपक गिरी, एमालेका घनश्याम पाण्ड र नेकपाका धनबहादुर मास्कीले मात्रै धरौटी बचाएको निमित्त प्रदेश निर्वाचन अधिकारी लालसिंह खड्काले बताए ।
