: अखिल नेपाल फुटबल संघ (एन्फा)को निर्वाचन हाललाई स्थगित गर्न राष्ट्रिय खेलकुद परिषद् (राखेप)ले पत्राचार गरेको छ।सोमबार राखेपले संघ संस्था शाखा समन्वयका प्रमुख चन्द्रकुमार राईको हस्ताक्षर सहितको पत्र एन्फालाई जारी गरेको हो।
आगामी चैत्र १३ गतेका लागि तोकिएको एन्फाको निर्वाचन हाललाई स्थगित गर्न राखेपले निर्देशन दिएको हो।
राखेपले स्पष्ट रुपमा राष्ट्रिय खेलकुद विकास नियमावली ऐन र राष्ट्रिय खेलकुद विकास ऐनको धारालाई व्याख्या गर्दै हाललाई एन्फाको निर्देशन रोक्न निर्देशन दिएको हो।‘राष्ट्रिय खेलकुद विकास नियमावली २०७९ को नियम ७ को (ग) अनुसार परिषद्को स्वीकृति नभएसम्म संघको साधारण सभा तथा निर्वाचन सम्बन्धी सम्पूर्ण कार्य स्थगित गर्न राष्ट्रिय खेलकुद विकास ऐन २०७७ को दफा २८ को (ड) बमोजिम जानकारीका लागि अनुरोध छ।’
यसअघि पनि पुस २२ गते प्रचलित कानुन बमोजिम गर्न ११ बुँदे निर्देशन सहित एन्फालाई पत्राचार गरेको थियो। उक्त निर्देशन माथि एन्फाले कुनै पनि समन्वय नगरी निर्वाचनको तालिका सार्वजनिक गर्दा राखेपले अर्को निर्देशन जारी गरेको हो।
सोही विषयलाई मध्यनजर गर्दै राखेपको निर्देशनको अवज्ञा र गैरकानुनी कार्य गरी अन्तर्राष्ट्रिय स्तरमा समेत राष्ट्रको प्रतिष्ठा र फुटबल खेलको विकासमा नकारात्मक असर पार्ने भन्दै एन्फा उपाध्यक्षसहित केन्द्रीय सदस्यहरूले राखेपमा उजुरी दिएका थिए।
