: प्रतिनिधि सभा निर्वाचनमा रोल्पाबाट नेपाली कम्युनिस्ट पार्टीका वर्षमान पुन (अनन्त) विजयी भएका छन्। उनले जिल्लाबाट ह्याट्रिक गरेका हुन्। २०७४ र २०७९ को चुनावमा पनि रोल्पाबाटै प्रतिनिधि सभामा निर्वाचित भएका थिए। पूर्व अर्थमन्त्री समेत रहेका अनन्तले २७ हजार ४ सय ६० मत लिएर विजयी भएका हुन्।
१५ हजार ४ सय ५२ को फराकिलो मतान्तरमा उनी विजयी भएका छन्। उनका निकटतम प्रतिद्वन्द्वी नेपाली कांग्रेसका उम्मेदवार डा. सुदनकुमावलीले १२ हजार ८ मत प्राप्त गरेका छन्।
रास्वपाका बालराम थापाले १० हजार ८ सय ९४ मत ल्याए। नेकपा एमालेका गोकुलप्रसाद घर्तीले ९ हजार ९ सय ३३, नेकपा माओवादीका चुडामणी वलीले ३ हजार ७ सय १४ मत ल्याएका छन्।
मंगोल नेशनल अर्गनाइजेसनका कुमार घर्तीले १ सय १८, नेशनल रिपब्लिक नेपालका मनबहादुर घर्तीले २ सय ७९, राप्रपाका अम्मबहादुर थापाले ८ सय ४६, जनमोर्चा नेपालका मेघनाथ विष्टले ३ सय १८ र आम जनता पार्टीका दिलबहादुर कामीले ६२ मत लिएको मुख्य निर्वाचन अधिकृत विनोद खतिवडाले जनाए। कुल ६८ हजार ७ सय ७७ मतमा ३ हजार १ सय ४४ मत बदर भयो। सदर मत ६५ हजार ६ सय ३२ छ।
विजयी अनन्त को हुन् ?
युवा उमेरमा विगतको सशस्त्र युद्धमा होमिएका अनन्त शान्ति प्रक्रियापछि पटक-पटक सरकारमा पुगि विभिन्न मन्त्रालय हाँकेका थिए। रोल्पा नगरपालिका-७ माडीचौरका स्थायी बासिन्दा अनन्त २०४२ सालमा संयुक्त जनमोर्चा नेपाल हुँदै राजनीतिमा प्रवेश गरेका थिए।
बुवा इर्खराम र आमा तिर्थमाली पुनको कोखबाट २०२८ जेठ १८ मा जन्मिएका थिए। तीन दिदीबहिनी र पाँच दाजु भाई मध्ये अनन्त माहिलो छोरा हुन्। स्नातकसम्म अध्ययन गरेका अनन्त २०४८ सालदेखि पूर्णकालीन भएका थिए। २०५२ फागुन १ गते सुरु भएको सशस्त्र लडाकु दस्तामा सामेल भएका थिए। ‘युद्धताका रोल्पा जिल्ला सेक्रेटरी समेत भएका थिए। नेकपाका नेता समेत रहेका युद्धका घाइते भानबहादुर घर्तीले भने, ‘सानैदेखि अनन्त मिलनसार र मेहनती हुनुहुन्थ्यो।’
२०५५ सालमा तत्कालीन माओवादी पार्टीको केन्द्रीय सदस्य हुँदै पार्टीको स्थायी समिति सदस्य समेत भए । नेकपाको उपमहासचिव समेत बनिसकेका अनन्त २०६४ सालको पहिलो संविधानसभाको निर्वाचनमा ललितपुर क्षेत्र नम्बर १ बाट निर्वाचित भएका थिए।
डा.बाबुराम भट्टराई नेतृत्वको सरकार र माओवादी-कांग्रेस गठबन्धनको सरकारका वेला अर्थमन्त्री भएका थिए। युद्धमा डेपुटी कमान्डर भएका अनन्त शान्ति तथा पुनर्निर्माण मन्त्री र ऊर्जा, जलस्रोत तथा सिँचाइ मन्त्री समेत भएका थिए।
२०७० सालको दोस्रो संविधानसभा चुनावमा मोरङ क्षेत्र नम्बर ९ बाट पराजय बेहोरेका अनन्तले गृह जिल्लाबाट भने ह्याट्रिक गरे। नेकपाका संयोजक पुष्पकमल दाहाल (प्रचण्ड) निकट रहेर काम गरेका नेता अनन्त परिस्थितिको सही विश्लेषण र आकलन गर्न माहिर मानिन्छन्। उनी प्रचण्ड विश्वास पात्र हुन्। राष्ट्रिय राजनीतिमा विशेष दखल राख्ने विजयी अनन्त नेकपामा प्रभावशाली बन्दै गएका छन्।
