: नेपाल सरकारका गृहमन्त्री ओमप्रकाश अर्यालले आसन्न निर्वाचनलाई निष्पक्ष, पारदर्शी र भयरहित बनाउन प्रशासनले कसैलाई पनि काखापाखा नगर्ने बताएका छन् ।
आसन्न फागुन २१ गते शान्तिपूर्ण रुपमा निर्वाचन सम्पन्न गराउने दायित्व सरकारको बताउँदै गृहमन्त्री अर्यालले वर्तमान अवस्थामा देशको विभिन्न जिल्लाको शान्ति सुरक्षाको अवस्थावारे जानकारी लिने क्रममा शुक्रवार रौतहट सदरमुकाम गौर आएका गृहमन्त्री अर्यालयले राजनीतिक अधिकार प्रयोग गर्न सहज वातावरण निर्माण गरिने तर कानुनविपरीत काम गर्नेलाई कुनै छुट नदिइने स्पष्ट पारे ।
रौतहटका सुरक्षा अधिकारीलाई निर्देशन पश्चात सञ्चारकर्मीहरुसँग संक्षिप्त कुरा गर्दै गृहमन्त्री अर्यालले राम्रो नियत र सभ्य व्यवहार गर्ने उम्मेदवार तथा दललाई सहजीकरण गरिनेछ । सहजकर्ताको भूमिकामा सरकार भएको बताउँदै गृहमन्त्री अर्यालले गलत गर्ने, कानुन मिच्ने जो–कोहीलाई कानुनी दायरामा ल्याएर कार्वाही गरिने बाचा गरे ।
निर्वाचन आयोगको आचारसंहिता अनुसार निर्वाचनसम्बन्धी कसूर गरेमा कारबाही हुने स्पष्ट व्यवस्था रहेको छ । दण्डहीनताको संस्कृतिलाई अन्त्य गर्ने उद्देश्यले कुनै पनि प्रकारको इन्डेम्निटी (उन्मुक्ति) नदिइने गृहमन्त्री अर्यालले बताए । केही समूहले अनावश्यक आशंका र अफवाह फैलाउने प्रयास गरे पनि गृहमन्त्रीले त्यस्ता हल्लामा विश्वास नगर्न स्पष्ट पारे । ‘सरकार र आयोगको तयारी स्पष्ट छ, निर्वाचन निर्धारित मितिमै शान्तिपूर्ण रूपमा सम्पन्न हुन्छ’, उनले भने ।
सञ्चारकर्मीको प्रश्नको जवाफमा गृहमन्त्री अर्यालले फागुन २१ गतेका निर्वाचनमा देश गईसकेकाले सरकार निर्वाचन केन्द्रित भइसकेको जनाए । रौतहटमा सीमा क्षेत्रदेखि लिएर अति संबेदनशिल, संबेदनशिल मतदात केन्द्रहरुमा सुरक्षाको उच्च प्रबन्ध मिलाएको र सम्पूर्ण तयारी पुरा भएको प्रमुख जिल्ला अधिकारी दिनेश सागर भुसालले ‘व्रिफिङ’ गरे ।
