: एन्फा राष्ट्रिय लिग–२०८२ अन्तर्गत बुधबारको पहिलो खेलमा लालीगुराँस एशोसियसनले काँक्रेविहार युथ क्लबलाई पराजित गरेको छ ।
त्रिपुरेश्वरस्थित दशरथ रंगशालामा भएको खेलमा लालीगुराँसले काँक्रेविहारलाई ४–१ गोल अन्तरले पराजित गरेको हो । यो जितसँगै लालीगुराँस एशोसियसन अंक तालिकाको शीर्ष स्थानमा उक्लिएको छ । लालीगुराँसका लागि मुकुन्दकुमार निउरेले खेलको ३५ औं मिनेटमा गोल गर्दै लालीगुराँसको अग्रता बनाएका थिए ।
अब्दुल युसुफ हाउलेले ३७ औं मिनेटमा व्याक्तिगत पहिलो र टिमको लागि दोस्रो गोल गरे । दोस्रो हाफमा लालीगुराँसका लागि हाउलेले २ गोल गरे । उनले खेलको ५५ औं र ५६ औं मिनेटमा गोल गर्दै व्याक्तिगत ह्याट्रिक पूरा गरे । काँक्रेविहार युथ क्लबका लागि खेलको ७१ औं मिनेटमा सोनम आचार्यले सान्त्वना गोल फर्काए ।
लालीगुराँसले काँक्रेविहारलाई पराजित गर्दै हालसम्म आफ्नो अपराजित यात्रा कायमै राखेको छ । लालीगुराँसले ७ खेलमा ५ जित र २ बराबरीसहित १७ अंक जोडेको हो । आजको दोस्रो खेलमा सातदोबाटो युथ क्लब र श्री भगवती क्लबले भने गोलरहित बराबरी खेल्दै अंक बाँडेका छन् ।
