: नेपाल-भारत सीमावर्ती बजार क्षेत्रमा सक्रिय एक भारतीय गिरोहले ठगी धन्दा सञ्चालन गर्दै आफ्नै देशका नागरिकलाई लुट्दै आएको एउटा घटना सार्वजनिक भएको छ।
घटनामा संलग्न एक नेपाली नागरिक, ६ भारतीय नागरिकसहित सात जना पक्राउ परेको जिल्ला प्रहरी कार्यालय झापाले बुधवार पत्रकार सम्मेलन गरी जानकारी गराएको हो।
उनीहरूले नेपालका सीमावर्ती क्षेत्रमा बसेर विभिन्न बहाना बनाउँदै आफ्नै देशका नागरिकलाई लक्षित गरी करोडौँ रकम असुल्ने योजना बनाउँदै आएको प्रारम्भिक अनुसन्धानको क्रममा खुलेको छ।
पक्राउ पर्नेहरूमा भारत पश्चिम बंगाल आदर्श पल्लीका ४५ वर्षीय अरिन्दम धर, पश्चिम बंगाल सारत पल्लीका ३६ वर्षीया दिपा भौमिक, पश्चिम बंगाल दक्षिण २४ परगना हरिनभीका ३५ वर्षीय सुमन सरकार, पश्चिम बंगाल दक्षिण २४ परगना मुसलमान पाराका ३७ वर्षीय नुर कलाम शेख, पश्चिम बंगाल जलपाईगुरीका ५२ वर्षीय अबेद अली होसैन, पश्चिम बंगाल राज्य उत्तर दिनाजपुर फालाहाकाटाका २० वर्षीय फारुक अज्मी र झापा कमल गाउँपालिका-६ का ४३ वर्षीय देवेन्द्र सापकोटा रहेका छन्।
घटनाको बारेमा जानकारी गराउँदै प्रहरी प्रवक्ता तथा डीएसपी खगेन्द्रबहादुर खड्काले गिरोहका सदस्यहरूले नेपालमा आफूहरूले व्यापारमा लगानी गरी मनग्य नाफा कमाएको तर कानुनी अड्चनका कारण उक्त रकम नेपालका सरकारी निकायले जफत गरेको दाबी गर्ने र सो रकम भारततर्फ ल्याउन ‘पेनाल्टी’ स्वरूप जरिवाना तिर्नुपर्ने भएकाले तत्काल केही रकम आवश्यक परेको भन्दै उनीहरूले विभिन्न प्रलोभन देखाएर चिनजान वा व्यापारिक पृष्ठभूमिका व्यक्तिहरूलाई भिडियो सन्देश पठाएर रकम असुल्ने योजना बनाउँदै आएका थिए। उनीहरूले यस पटक एक जना कलकत्ताका एक व्यवसायलाई प्रलोभनमा पारी १२ करोड भारतीय रुपैयाँ असुल्ने योजना बनाएको अनुसन्धानको क्रममा खुलेको छ।
घटना विवरण अनुसार मंगलबार साँझ ६ बजेको समयमा डब्लुबी ०६एक्स०३०० नम्बरको टोयोटा कम्पनीको फच्र्युनर र डब्लुबी ०६ यु ३००६ नम्बरको सुजुकी कार शङ्कास्पद रुपमा चन्द्रगढी बजारबाट काँकडभिट्टा तर्फ गइरहेको अवस्थामा सशस्त्र प्रहरी बल नेपाल, २ नम्बर हेडक्वार्टर गणले भद्रपुर-८ स्थित घोडामारामा चेकजाँच क्रममा दुवै गाडीहरूलाई रोकेर चेकजाँच गर्दा नेपाल प्रहरीको आइडी कार्ड, सरकारी छाप लगायतका अन्य कागजातहरू फेला परेपछि उनीहरूलाई नियन्त्रणमा लिएर नेपाल प्रहरीलाई बुझाइएका थिए।
प्रहरीले थप अनुसन्धान गर्दा उनीहरूले मेचीनगर नगरपालिका ४ आमडाँगीस्थित लुकाइछिपाई राखिएको २१ वटा टिनको बक्सा र २३७ बन्डल नोट आकारको सादा कागज राखेको जानकारी दिएपछि सो सामान पनि बरामद गरिएको डीएसपी खडकाले बताए । साथै उनीहरूको साथबाट सरकारी छाप तथा दस्तखत किर्ते कागजातहरू, नेपाल सरकारको निशान छाप र नेपाल प्रहरीको किर्ते गरी बनाइएको परिचय पत्र, नक्कली सरकारी डकुमेन्टहरू समेत बरामद भएको उनको भनाई छ।
‘उनीहरूले नोट आकारको सादा कागजको प्रत्येक बन्डलमा तल माथि सक्कली नेपाली नोट र साथमा सरकारी कार्यालयको पत्र समेत राखी आफूले व्यापारमा लगानी गरी नाफा कमाएको रकम यो भन्दै व्यवसायलाई प्रलोभनमा पार्न भिडियो सन्देश पाउँथ्यो,’ उनले भने। डेढ महिना अगाडि उनीहरूले पैसाको फोटो र भिडियो बनाउन मेचीनगर ४ स्थित एक होटेलमा कोठा ल्याइ उक्त टिनको बक्सा र नोट आकारको सादा कागजको बन्डलको फोटो तथा भिडियो बनाएको उनले बताए।
उनीहरूले त्यसरी लुटेका रकम नेपालका विभिन्न क्यासिनोमा लगानी गर्ने योजना बनाएका थिए। त्यसमध्ये पक्राउ परेका अरन्दिम धर काठमाडौंको एउटा क्यासिनोमा लगानी गरिसकेका व्यक्ति हुन्। पक्राउ परेका उनीहरूलाई मुलुकी अपराध संहित २०७४ बमोजिम लिखत सम्बन्धी कसुर अन्तर्गत अनुसन्धान तथा कारबाही प्रक्रिया अघि बढाएको प्रहरीले जनाएको छ।
