: अवैध लागुऔषधसहित विभिन्न स्थानबाट छ जनालाई प्रहरीले नियन्त्रणमा लिएको छ। पक्राउ पर्नेमा स्याङ्जा,कञ्चनपुर र कैलालीका रहेका छन्।
स्याङ्जाको अर्जुनचौपारी गाउँपालिका-१ जिरोबाट लागुऔषध डाईजेपाम ५ एम्पुल, फेनारगन ५ एम्पुल र बुप्रेनोर्फिन ५ एम्पुलसहित २७ वर्षीय अनिस थापा समेत दुईजना पक्राउ परेका छन्। उनीहरूलाई मंगलबार दिउँसो प्रहरीले नियन्त्रणमा लिएको हो। जिल्ला प्रहरी कार्यालय स्याङ्जा समेतबाट खटिएको प्रहरीले ना.२२ प ८२५९ नम्बरको मोटरसाइकलमा सवार उनीहरूलाई उक्त लागुऔषधसहित पक्राउ गरेको हो ।
यसै क्रममा कञ्चनपुर,बेलौरी नगरपालिका-८ स्थित कलकत्ता बजारबाट अवैध लागुऔषध खैरो हेरोइन जस्तो देखिने पदार्थ १ ग्राम ३ सय ३० मिलिग्रामसहित कृष्णपुर नगरपालिका-३ देखदभुली बस्ने २० वर्षीय दिपेश रानालाई मंगलबार राति प्रहरीले पक्राउ गरेको हो । प्रहरी चौकी पचुइबाट खटिएको प्रहरीले भारतबाट नेपालतर्फ साइकलमा आउँदै गरेका उनलाई उक्त पदार्थ सहित पक्राउ गरेको हो ।
कैलाली,धनगढी उपमहानगरपालिका-२ बैजनाथ टोलबाट अवैध लागूऔषध खैरो हेरोइन जस्तो देखिने पदार्थ ५० मिलिग्रामसहित सोही उपमहानगरपालिका-२ डेरा गरी बस्ने बर्दगोरिया गाँपालिका-२ घर भएका २९ वर्षीय कनैया चौधरी समेत तीन जनालाई पनि प्रहरीले नियन्त्रणमा लिएको छ। जिल्ला प्रहरी कार्यालय कैलालीबाट खटिएको प्रहरीले उनीहरूलाई उक्त पदार्थ सहित पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको छ ।
