— उत्तर कोरियाली नेता किम जोङकी बहिनी किम यो जोङले सरकारका विभागहरु हेर्ने निर्देशकको जिम्मेवारी पाएकी छिन् । यसअघि उनी विभागकी उप–निर्देशक थिइन् । वकर्स पार्टीको नवौं महाधिवेशनले उनलाई निर्देशकमा नियुक्त गरेको हो ।
प्योङयाङको आधिकारिक कोरियन सेन्ट्रल न्यूज एजेन्सी (केसीएनए) का अनुसार वर्कर्स पार्टीको केन्द्रीय समितिले सोमबार किम यो जोङलाई विभाग निर्देशक नियुक्त गरेको हो ।
पाँच वर्षमा हुने वकर्स पार्टीको महाधिवेशनमा सहभागि हुन हजारौं मानिस राजधानी प्योङयाङमा आएका छन् । जसमध्ये, झन्डै ५ सयजना अधिकारीक प्रतिनिधि छन् । महाधिवेशनले कुटनीतिदेखि युद्ध योजनासम्म तयार गर्छ ।
एक पार्टी प्रणाली भएकाले कोरियामा वकर्स पार्टीले नै सरकार सञ्चालनको निर्णय लिन्छ । पार्टी महासचिव र नेताका रूपमा किम जोङ राज्य सञ्चालनको असिमित अधिकार हुन्छ ।
यसअघि पार्टी महाधिवेशनले सर्वोच्च नेता किमलाई महासचिवमा निरन्तरता दिने निर्णय सर्वसम्मत रुपमा गरिसकेको छ ।
