— कप्तान ह्यारी ब्रुकको शतकप्रेरित इंग्ल्यान्डले मंगलबार ट्वान्टी–२० विश्वकप क्रिकेटको सुपर एटमा पाकिस्तानलाई २ विकेटले पराजित गरेको छ । ब्रुकले ट्वान्टी–२० अन्तर्राष्ट्रियमा आफ्नो पहिलो शतक बनाएपछि इंग्ल्यान्डले १ सय ६५ रनको लक्ष्य ५ बलअघि पूरा गर्यो ।
इंग्ल्यान्ड सुपर एटमा लगातार दोस्रो खेलमा विजय हात पार्दै सेमिफाइनल पुगेको छ । इंग्ल्यान्डले पहिलो खेलमा श्रीलंकालाई ५१ रनले पराजित गरेको थियो । यता हारले पाकिस्तान बाहिरिने स्थितिमा पुगेको छ । पाकिस्तानको श्रीलंकासँग पहिलो खेल वर्षाले रद्द बनाएको थियो ।
क्यान्डीमा १७ औं ओभरमा ब्रुक ठ्याक्कै १ सय रन पूरा गरेपछि अर्को बलमा शाहिन साह अफ्रिदीको बलमा बोल्ड भए । त्यसपछि भने खेलमा उतारचढाव रह्यो । १८ औं ओभरमा सलमान मिर्जाले ५ रनमात्र दिए भने १९ औं ओभरमा मोहम्मद नवाजले विल ज्याक्स र जेमी ओभरटन (०) लाई आउट गरे । तर, अन्तिम ओभरमा ३ रन चाहिँदा जोफ्रा आर्चरले मिर्जालाई चौका प्रहार गर्दै इंग्ल्यान्डलाई विजयी बनाए ।
प्लेयर अफ द म्याच ब्रुकले ५१ बलमा १० चौका र ५ छक्का प्रहार गरे । उनले विल ज्याक्ससँग छैटौं विकेटमा ५२ रनको महत्त्वपूर्ण साझेदारी गरे । ज्याक्सले अर्को एउटा उपयोगी इनिङ्स खेल्नेक्रममा २३ बलमा १ चौका र २ छक्कासहित २८ रन बनाए । माथिल्लोक्रममा फिल सल्ट शून्य, जोस बटलर २, ज्याकोब बेथेल ८, टम बान्टोन २ र साम करन ११ रनमा आउट भए । अफ्रिदीले ४ ओभरमा ३० रन खर्चेर २ तथा मिर्जा र उस्मान तारिकले २–२ विकेट लिए ।
यसअघि स्पिनर लिएम डावसनले ३ विकेट लिएपछि इंग्ल्यान्डले पाकिस्तानलाई १६४–९ को स्कोरमा रोकेको थियो । डावसनले त्ययसका लािग २४ रन खर्चे । जेमी ओभरटनले २६ र आर्चरले ३२ रन खर्चेर २–२ विकेट लिएपछि टस जितेर ब्याटिङमा आएको पाकिस्तानले ठूलो स्कोर बनाउन सकेन ।
साहिबजादा फरहानले ६३ रन बनाए । ओपनर फरहानले ४५ बलमा २ छक्का र ७ चौका प्रहार गरे । प्रतियोगितामा उनको तेस्रो अर्धशतक हो । सैयम अयुबलाई तेस्रो ओभरमा ७ रनमा आउट गरी आर्चरले इंग्ल्यान्डलाई सुरुआती सफलता दिलाएका थिए । डावसनले सलमान आघालाई आउट गरी अर्को विकेट दिलाए ।
फरहान र बाबर आजमले तेस्रो विकेटमा ४६ रनको साझेदारी गरे । बाबरले २४ बलमा २५ रन बनाए । फाखर जमानले १६ बलमा २ छक्का प्रहार गर्दै २५ रन बनाए भने सदाब खान २३ रनमा अविजित रहे ।
एएफपी
