— गुल्मीमा फागुन १६ बाटै मदिरा बिक्रीमा रोक लगाइएको छ । आगामी हप्ता हुने प्रतिनिधिसभा निर्वाचनलाई मध्यनजर गर्दै मदिराजन्य पदार्थ बिक्रीमा रोक लगाइएको हो । सर्वदलीय बैठकले फागुन १६ बाटै मदिराजन्य पदार्थको बिक्रीमा रोक लगाउने निर्णय गरेको प्रमुख जिल्ला अधिकारी बद्रीनाथ गैरेले जानकारी दिए । फागुन १६ देखि २१ गतेसम्म रक्सी बेच्न रोक लगाइएको उनले बताए ।
फागुन २१ गते हुने प्रतिनिधिसभा निर्वाचनको सुरक्षालाई मध्यनजर गर्दै गुल्मी जिल्लामा पाँच दिनसम्म मदिराजन्य पदार्थको बिक्री वितरण तथा सेवनमा पूर्णरूपमा रोक लगाइएको छ । प्रमुख जिल्ला अधिकारी गैरेका अनुसार, निर्वाचनको समयमा शान्ति–सुरक्षा कायम राख्न र कुनै अप्रिय घटना हुन नदिन मदिरा बिक्री र सेवन रोक लगाइएको हो । साथै उनले निर्वाचन प्रक्रिया स्वच्छ, निष्पक्ष र भयरहित वातावरणमा सम्पन्न गराउन जिल्ला प्रशासन कार्यालय गुल्मी प्रतिबद्ध रहेको बताए । मदिरा बिक्रीमा रोक लगाइएको अवधिमा मदिराजन्य पदार्थको कारोबार र सेवनमा कडाइका साथ निगरानी गरिने पनि तयारी भइरहेको छ ।
निर्णय उल्लंघन गर्ने व्यक्ति वा व्यवसायीमाथि प्रचलित कानुनअनुसार कारबाही गरिनेछ । यससम्बन्धी जिल्ला प्रहरी कार्यालयले नियमित अनुगमन तथा संयुक्त गस्ती परिचालन भइरहेको प्रमुख जिल्ला अधिकारी गैरेले बताएका छन् ।
