: आइसीसी टी २० विश्वकप २०२६ मा पाकिस्तानलाई २ विकेटले पराजित गर्दै इङ्ल्यान्ड सेमिफाइनल प्रवेश गरेको छ। श्रीलङ्काको पालेकेले स्टेडियममा भएको सुपर ८ अन्तर्गतको खेलमा इङ्ल्यान्डले पाकिस्तानलाई हराउँदै जारी विश्वकपमा सेमिफाइनल प्रवेश गर्ने पहिलो टोली बनेको हो।
टस जितेर पहिले ब्याटिङ गरेको पाकिस्तानले निर्धारित २० ओभरमा ९ विकेट गुमाउँदै १६४ रन बनाएको थियो। पाकिस्तानले दिएको १६५ रनको विजयी लक्ष्य पछाएको इङ्ल्यान्डले १९.१ ओभरमा ८ विकेट गुमाउँदै १६६ रनसहित लक्ष्य पूरा गरेको हो।
इङ्ल्यान्डको जितमा कप्तान ह्यारी ब्रोकले शतकीय पारी खेले। उनले ५१ बलमा १० चौका र चार छक्का सहित १०० रन बनाएका हुन्। ओपनरद्वय फिल साल्ट र जोश बट्लर सस्तैमा पेभेलियन फर्किदा ह्यारी ब्रुकको शतकीय पारीले इङ्ल्यान्डको जिततर्फ उन्मुख गरेको हो। साम करनले १६ र विल ज्याक्सले २८ रन बनाए। लियम डुवासन १ रन र जोफ्रा आर्चर ५ रनमा अविजित रहे।
पाकिस्तानका लागि बलिङ तर्फ शाहिंन शाह अफ्रिदीले सर्वाधिक ४ विकेट लिए मोहम्मद नवाज र उस्मान तारिकले समान २-२ विकेट लिए। त्यसअघि पहिलो इनिङमा ब्याटिङ गरेको पाकिस्तानका लागि ओपनर ब्याटर साहिबजादा फरानले सर्वाधिक ६३ रन बनाए। उनले ४५ बलमा ७ चौका र २ छक्का प्रहार गरे। अर्का ओपनर सैम अयुब ७ र वान डाउन आएका कप्तान सलमान अघा ५ रनमा डगआउट फर्किए। बाबर आजमले २४ बलमा दुई चौका सहित २५ रन बनाए। फखर जमानले पनि समान २५ रन बनाए। सदाब खानले २३ रन बनाउँदा अन्य कुनै पनि ब्याटरले दोहोरो अङ्कमा रन बनाउन सकेनन्।
इङ्ल्यान्डको बलिङतर्फ लियम डुवासनले सर्वाधिक ३ विकेट लिए। जोफ्रा आर्चर र जेमी ओभरटनले समान २-२ विकेट लिए। आदिल रसिदले १ विकेट लिए।
यससँगै पाकिस्तानले सेमिफाइनल खेल्ने सम्भावना निकै कम बाँकी रहेको छ। पहिलो खेल वर्षाका कारण अवरुद्ध हुँदा पाकिस्तानले दुई खेलबाट एक अंक मात्रै जोड्न सफल भएको हो। इङ्ल्यान्डले भने पहिलो खेलमा श्रीलङ्कालाई ५१ रनले पराजित गरेको थियो। लगातार दुई खेल जित्दै इङ्ल्यान्ड ४ अङ्क जोड्दै सेमिफाइनल पुगेको हो।
आज सुपर ८ अन्तर्गत एक खेल रहेको छ । जसमा सहआयोजक श्रीलंकाले न्युजिल्यान्डसँग खेल्नेछ। यो खेल नेपाली समयअनुसार साँझ ७:१५ मा सुरु हुनेछ।
