: पाकिस्तानले अफगानिस्तान–पाकिस्तान सीमा क्षेत्रमा हवाई हमला गरेको छ । यस कदमलाई हालै इस्लामाबादको शिया मस्जिदमा भएको आत्मघाती बम विस्फोट र अन्य सुरक्षा हमला घटनाहरूको जवाफ स्वरूप उठाइएको बताइएको छ।
पाकिस्तानी सेनाका अनुसार यस आक्रमणले सशस्त्र समूहहरूसँग सम्बन्धित सात शिविर र लुकेका ठाउँहरुलाई लक्षित गरेको थियो। ती समूहहरूले हालैका आतंककारी गतिविधिहरूको योजना बनाएको र तालिम तथा निर्देशन अफगानिस्तानबाट लिएका थिए।
अफगानिस्तानको तालिबान सरकारबाट हालसम्म कुनै आधिकारिक प्रतिक्रिया आएको छैन। तर, अफगान स्रोतहरूले स्थानिय सञ्चारमाध्यमलाई बताएअनुसार आइतबार दुई सीमावर्ती प्रान्तहरूमा आक्रमण भएको पुष्टि गरेका छन्।
जसमा पक्तिका प्रान्तको एक धार्मिक विद्यालय र नांगरहार प्रान्तमा ड्रोन आक्रमण भएकाे हाे। यस अघि इस्लामाबादमा भएको शिया मस्जिदमा आत्मघाती बम विस्फोटमा दर्जनौं उपासकको मृत्यु भएको थियो। पाकिस्तानले ती घटनाहरूमा पाकिस्तानी तालिबान (TTP) र इस्लामिक स्टेट अफ खोरासान प्रान्त (ISKP) का समूहहरूको संलग्नता रहेको दाबी गरेको छ।
पाकिस्तानले बारम्बार अफगान तालिबान सरकारसँग आफ्नो भूमिमा पाकिस्तानविरुद्ध आतंकवादी गतिविधि गर्नेहरूलाई आश्रय नदिन अनुरोध गरेको छ, तर अहिलेसम्म अफगानिस्तानले कुनै ठोस कदम नउठाएको पाकिस्तानको आरोप छ।
