— प्रतिनिधिसभा सदस्य निर्वाचन नजिकिँदै जाँदा नेपाल–भारत सीमा क्षेत्रमा सुरक्षा सतर्कता बढाइएको छ ।
भारतबाट भित्रिने यात्रुको आवागमन सहजीकरण तथा सुरक्षा जाँचलाई थप कडाइ पारिएको हो ।
२१ फागुनमा देशभर एकै चरणमा निर्वाचन हुँदै छ । निर्वाचन नजिकिँदै जाँदा भारतबाट भित्रिने यात्रुको संख्या क्रमशः बढ्न थालेको सुरक्षा निकायहरूले जनाएका छन् । आवागमन हुने क्षेत्रमा सशस्त्र प्रहरीले सहायता कक्ष (हेल्प डेस्क)मार्फत आवागमन समन्वय र सुरक्षा जाँच थप बढाएको हो ।
भारतसँग पूर्वको ताप्लेजुङदेखि सुदूरपश्चिम कञ्चनपुरसम्म करिब १ हजार ८ सय ८० किमी लम्बाइमा सीमा फैलिएको छ । चीनतर्फ करिब १ हजार ४ सय १४ किमी लम्बाइमा सीमा जोडिन्छ । कर्णालीबाहेक छ वटै प्रदेशका दक्षिण तर्फका जिल्ला भारतसँग जोडिन्छन् ।
यसमा पनि कोशी, मधेश, लुम्बिनी र सुदूरपश्चिम प्रदेशका नाकाबाट बढी आवागमन हुन्छ । भारततर्फ सशस्त्र प्रहरीले २ सय ४९ र चीन तर्फ ११ स्थानमा ‘बोर्डर आउट पोस्ट’ (बीओपी)मार्फत सीमा सुरक्षामा जनशक्ति तैनाथ गराएकामा बीओपी भएका चेक प्वाइन्टमै व्यवस्थित र यात्रु आवागमन खटिएका सुरक्षाकर्मीले आवागमन गर्ने यात्रु सहजीकरण र सुरक्षा जाँच बढाएका छन् ।
सशस्त्र प्रहरी प्रवक्ता डीआईजी विष्णुप्रसाद भट्टका अनुसार नियमित रूपमा भइरहेका आवागमनमा पनि सुरक्षा जाँच र यात्रु सहायता कक्षमार्फत सहजीकरण र सुरक्षा जाँच गरिँदै आएकामा निर्वाचन लक्षित गरेर यसलाई थप मजबुत रूपमा परिचालन गरिएको जानकारी दिए ।
चीनसँग भिसा र स्थानीयको हकमा जिल्ला प्रशासन कार्यालयबाट जारी भएका पासमार्फत आवागमन गर्न पाइन्छ । तर, भारतसँग खुल्ला सिमाना भएका कारण आवागमन सहज छ । भारतमा रोजगारीका क्रममा रहेका नेपाली आसन्न निर्वाचनमा मतदानका लागि फर्कने क्रम सुरु भएको र त्यसलाई सहज आवागमन बनाउन सहायता कक्षमार्फत सहजीकरण गरिएको सशस्त्रले जनाएको छ ।
निर्वाचनमा ७२ घण्टासम्म नेपाल र भारतले सीमा सिल गर्ने निर्णय गरिसकेका छन् । त्यसअघि भित्रिने यात्रुलाई सुरक्षित र सहज रूपमा गन्तव्य सम्म पुग्न आवश्यक सहजीकरण गरिएको हो ।
