— इरानमा गत जनवरीमा हिंसात्मक दमनपछि केही समय मत्थर भएको आन्दोलन फेरि सुरु भएको छ । शनिबार तेहरानको सरीफ युनिभर्सिटी अफ टेक्नोलोजीअन्तर्गतका क्याम्पसहरुमा नयाँ सेमेस्टर सुरु हुनसाथ विद्यार्थीहरुले आन्दोलन सुरु गरे ।
त्यस्तै, गत जनवरीमा मारिएकाहरुको संझनामा मौन धारण गरेपछि राष्ट्रिय झन्डा बोकेर मार्चपास गरे । लगत्तै उनीहरुसँग सरकार समर्थकहरुको झडप भएको थियो ।
राजधानीको शाहिद बेहेस्ती विश्वविद्यालयमा पनि शान्तिपूर्ण धर्ना कार्यक्रम भएको बीबीसीले जनाएको छ । त्यस्तै तेहरानको अमिर कबिर विश्वविद्यालयसहित धेरैवटा विश्वविद्यालयअन्तर्गतका क्याम्पसमा सरकारविरोधी आन्दोनल भएको छ ।
गत महिना सरकारले आन्दोलनमा हिंस्रक दमन गर्दा ठूलो संख्यामा मानिसहरुको मृत्यु भएको थियो । इन्टरनेट तथा सुचनामाथि प्रतिबन्ध लगाइएकाले अन्तर्राष्ट्रिय सञ्चारमाध्यमलाई मृतकको यकिन संख्या पुष्टि गर्न पनि कठिन भएको थियो ।
अमेरिकास्थित मानव अधिकार सम्बन्धी समाचार एजेन्सी (ह्राना) ले कम्तिमा ६,१५९ जनाको मृत्यु भएको पुष्टि गरेको बताएको छ । ह्रानाले थप १७,००० जना मृत्यु भएको खबर आएपनि यसको पुष्टि नभएको जनाएको थियो ।
बेलायतबाट सञ्चालन हुने पर्सियन भाषाको सञ्चारमाध्यम ईरान इन्टरनेशनलले कम्तिमा ३२ हजार मारिएको जनाएको थियो । इरानी अधिकारीहरूले गत महिनाको अन्त्यतिर ३,१०० भन्दा बढी मानिसहरू मारिएको बताएका थिए ।
अमेरिकासँग वार्ताको टेबुल र युद्धको तयारी
इरानी अधिकारीहरूले अमेरिकासँग सम्भावित युद्धको तयारी गरिरहेका बेला शनिबारको विरोध प्रदर्शन भएको हो । अमेरिकाले अब्राहम लिंकन युद्धपोतलाई लामो समयदेखि अरेबियन सागरमा तैनाथ गरिरहेको छ ।
त्यस्तै,विश्वकै ठूलो युद्धपोत युएसएस फोर्ड क्यारेबियन सागरबाट अरेबियन सागरतर्फ गइरहेको छ । अमेरिकी राष्ट्रपति डोनाल्ड ट्रम्पले ईरानमा सैन्य हमलाको विकल्प खुला रहेको बताएका छन् । दुई देशबीच आणविक कार्यक्रमलाई लिएर वार्ता पनि चलिरहेको छ ।
गत मंगलबार स्विचरल्यान्डको जेनेभामा दोस्रो चरणको अप्रत्यक्ष वार्ता भएको थियो ।
