— दक्षिण अफ्रिकाले ट्वान्टी-२० विश्वकपको आइतबार भएको 'सुपर एट'को खेलमा भारतमाथि शानदार ७६ रनको जित हात पारेको छ ।
अहमदाबादको नरेन्द्र मोदी स्टेडियममा भएको खेलमा भारतले जितका लागि १ सय ८८ रनको लक्ष्य पाएको थियो । त्यसलाई पछ्याउने क्रममा भारत १८.५ ओभरमा १ सय ११ रन बनाएर अलआउट भयो ।
भारतका लागि शिवम दुबेले ३७ बलमा सबैभन्दा बढी ४२ रन बनाए । लगातार तीन शून्यको प्रदर्शनपछि ओपनर अभिषेक शर्माले १५ रन बनाए । यस्तै, कप्तान सूर्यकुमार यादव र हार्दिक पान्ड्याले समान १८ रन जोडे । दक्षिण अफ्रिकी बलरमध्ये मार्को जेनसेनले २२ रनमा ४ विकेट लिए । केशव महाराजले पनि २४ रनमा ३ विकेट लिए ।
भारतको सुरुआत पनि राम्रो रहेन र इसान किसन शून्यमै आउट भए । यस्तै, तिलक वर्माले पनि १ रन मात्र जोडे । टस जितेर पहिले ब्याटिङको निर्णय गरेको दक्षिण अफ्रिकाले कमजोर सुरुआतलाई निस्तेज पार्दै ७ विकेटमा १ सय ८७ रनको सम्माजनक स्कोर खडा गरेको थियो ।
दक्षिण अफ्रिकाले २० रन बनाउँदासम्म ३ विकेट गुमाएको थियो र यसक्रममा दबाबमा देखिएको थियो । तर त्यसयता मध्यत्रमका ३ ब्याटरले दक्षिण अफ्रिकी इनिङ्स सम्हाले । डेवाल्ड ब्रेभिसले ४५ र डेविड मिलरले ६३ रन बनाए ।
यस्तै, स्ट्रिस्टन स्टब्सले ४४ रन थपे । भारतीय बलरमध्ये जसप्रित बुमराहले १५ रनमा ३ विकेट लिए । यस्तै, अर्सदीप सिंहले पनि २८ रनमा २ विकेट हात पारे ।
