— नेकपा माओवादीका महासचिव नेत्रविक्रम चन्दले फागुन २१ मा हुने प्रतिनिधिसभा सदस्य निर्वाचनबाट जेन–जी पुस्ताले उठाएका सवालको सम्बोधन हुनेमा आशंका व्यक्त गरेका छन् ।
उनले सरकारले निर्वाचनको घोषणा गरेर तयारी समेत गरे पनि ‘जनताको चाहना’ बमोजिमको व्यवस्थापकीय सुधार हुन नसक्ने बताए । उनले जेन–जी पुस्ताको मागको सम्बोधन गरेर निर्वाचन गरेको भए न्याय हुने बताए ।
‘जेन–जी पुस्ताले जे जति आवाज उठाए, त्यसको सम्बोधन हुने कुनै छाँट छैन । अहिलेका ठूला भनिएका दलहरुको रवैया उस्तै छ । सच्चिने र जनताका आवाज सुन्ने अवस्थामा नेताहरु छैनन् । यस्तो अवस्थामा भएको निर्वाचनबाट देशको भलो हुनेवाला छैन,’ जन्म जिल्ला रोल्पामा आयोजित राजनीतिक सभा र कार्यक्रममा मुख्य पाहुनाका रुपमा उपस्थित हुन आइपुगेका महासचिव चन्दले भने, ‘युवा पुस्ताको माग र मुलुकको अस्तव्यस्त राजनीतिको निकासका लागि निर्वाचन सही सावित हुनुपर्ने हो । त्यस अवस्था देखिएको छैन । यो सरकारबाट भएको निर्वाचनले जेन–जी आन्दोलन र त्यसको माग अनुसार काम गरेको छैन । त्यसैले यो निर्वाचन भए पनि निकास निस्केला जतो लाग्दैन ।’
लामो समय आफ्नो माउपार्टी तत्कालीन माओवादीको नेतृत्वप्रति टिप्पणी गर्न र प्रश्न उठाउनमै बिताएका उनले सबै सरकार भ्रष्टाचार गर्नमै लागिपरेको आरोप लगाए । तत्कालीन माओवादी ‘जनयुद्ध’ असफल र अपूर्ण भएकाले जेन–जी विद्रोह पनि भएको तर्क गर्दै उनले माओवादी विद्रोह र जेन–जी विद्रोह उस्तै भएको बताए । ‘माओवादीले युद्धको घोषणा गरेर बीचमा छाड्यो, त्यस्तै जेन–जी विद्रोह पनि बीचमै हरायो,’ उनले भने, ‘त्यसैले यी दुवैको सम्बन्ध पनि छ । जनयुद्ध असफल हुनुको कारण भ्रष्टाचार वृद्धि भयो । भ्रष्टाचार र पारदर्शिता शून्य भएपछि जेन–जी पुस्ताले विद्रोह गरेको हो । तर पनि दलहरु नसच्चिनु दुःख पक्ष हो ।’
चन्दले प्रहरीभित्र डार्फर काण्ड र त्यसपछिका सरकारले गरेका कैयौं भ्रष्टाचारका काण्डले विश्वमै बेइज्जत भएको टिप्पणी गरे । उनले पोखरा र भैरहवा विमानस्थल बनाउने क्रममा भएका भ्रष्टाचार काण्ड त्यसैका उदाहरण भएको दाबी गरे । उनले भने, ‘सबै क्षेत्रमा भ्रष्टाचार छ । घुस खुवाउने खुला नीति छ । पार्टी र दलको असफलताले यस्तो अवस्था आएको हो । जेन–जी विद्रोहको परिणाम सही तरिकाको निर्वाचन प्रणाली र उपलब्धि भन्ने हो । तर त्यस्तो भएन ।’
जेन–जी विद्रोहबाट केपी ओलीको सरकार हटाउने र सुशीला कार्कीको सरकार बनाउने काम भएको उनले बताए । गरिबीमा थिचिएका नेपाली र मुलुकभरमा भएका सुकुम्बासीको समस्याप्रति ध्यान नपुगेको टिप्पणी गर्दै उनले जताततै राजनीतिकरण मात्रै गरिएको र त्यसकै नारा मात्रै बनाइएको बताए ।
सुरुमा निर्वाचनमा रोल्पाबाटै उम्मेदवारी दिने घोषणा गरेका चन्दले पछि जिल्लाका नेता चुडामणि वलीलाई उम्मेलदार बनाए । आफ्नो दलले पहिलोपटक निर्वाचनको सामना गरिरहेको बताउँदै उनले जनताको साथ पाए मुलुकलाई आत्मनिर्भर बनाउन पहल गर्ने बताए । ‘एक पटक सत्तामा पुग्ने र आफ्नै नेतृत्वमा जनताको सत्ता चलाउने चाहना छ,’ उनले भने, ‘जनताका माग र चाहनालाई पूरा गर्ने योजना छ । उत्पादनसँग जोडिएर अघि बढ्ने चाहना छ। रोल्पामा पनि कृषि र फलफुलको मुख्य आधार क्षेत्र बनाउने हामीसँग योजना छन् । त्यस्तै रोल्पाको जलजला र थबाङलाई जोडेर पर्यटनको विकास गर्ने हाम्रो उद्देश्य छ ।’
उनले रवि लामिछाने र अन्य नयाँ दलप्रति टिप्पणी गर्दै विचार, नीति र कार्यदिशा नभएका दल भएको आरोप लगाए। ‘ती नयाँ भनिएका पार्टी खास नयाँ होइनन् । कहिलेकाँही फासिवादी पनि नयाँ पार्टी बन्न सक्छन् । यी त्यस्तै हुन् ।’
निर्वाचन विशेष अभियानका क्रममा दाङ, प्युठान हुँदै रोल्पा आइपुगेका महासचिव चन्दले रोल्पाका सुलिचौर, लिबाङ, घर्तीगाउँ र जिनाबाङका कार्यक्रम र सभामा भाग लिएका थिए । लिबाङमा बुद्धिजीवी र पक्रकारसँग अन्तरत्रिया गर्दै उनले अफ्ठ्यारो अवस्थामा मुलुक पुगेकाले मुलुकको स्वाधीनता र राष्ट्रियता जोगाउन राष्ट्रवादी शक्तिहरु एकजुट हुनुपर्ने धारणा व्यक्त गरेका थिए ।
वास्तविक जनताको चाहना बुझेर मुलुकको हितका लागि लाग्न युवा र देशभक्तसँग उनले आग्रह गरेका थिए । सुलिचौर, घर्तीगाउँ र जिनाबाङमा उनले पार्टीको सभालाई सम्बोधन गरेका थिए । रोल्पामा उनको पार्टीका तर्फबाट प्रत्यक्ष र चार जना समानुपातिक गरी ५ जना प्रतिनिधिसभा सदस्य उम्मेदवार छन् ।
निर्वाचन विशेष कार्यक्रममा उनले रोल्पामा करिब एक साता बिताएका छन् । रोल्पाका कार्यक्रम सम्पन्न गरेर आइतबार उनी सल्यान हुँदै कालीकोट पुग्ने योजनामा छन् । त्यहाँ उनले उम्मेदवार खड्कबहादुर विश्वकर्माको पक्षमा मत माग्ने नेकपा माओवादी रोल्पाका सचिव पृथ्वी डाँगीले बताए ।
