: निर्वाचन आयोगले आगामी फागुन २१ गते हुने प्रतिनिधिसभा निर्वाचनलाई सफल बनाउन सबैलाई आह्वान गरेको छ। शुक्रबार विराटनगरमा आयोजना गरेको अन्तरक्रियामा कार्यवाहक प्रमुख निर्वाचन आयुक्त रामप्रसाद भण्डारीले निर्वाचनलाई शान्तिपूर्ण, निष्पक्ष र भयमुक्त बनाउन जिम्मेवारी सबैको भएको बताएका हुन्।
भण्डारीले निर्वाचन आचारसंहिता पालन नगरी स्वच्छ प्रतिष्पर्धा सम्भव नहुने बताए। भण्डारीले भने, ‘भारतीय नम्बर प्लेट भएका सवारीसाधन प्रयोग नगर्नुहोस्। आचारसंहिता उल्लंघन भए कडा कारबाही हुनेछ।’ उनका अनुसार निर्वाचनमा अनुमानित खर्च एक अर्ब रुपैयाँसम्म पुग्न सक्ने सम्भावना छ।
निर्वाचनमा आचारसंहिता उल्लंघनका उजुरीहरू देशभर दैनिक बढिरहेको जानकारी दिँदै भण्डारीले जिल्लास्थित निर्वाचन अनुगमन समितिलाई तत्काल कारबाही गर्न पूर्ण अधिकार रहेको स्पष्ट पारे। उनले भने, ‘आचारसंहिता पालन नगरेको खण्डमा निर्वाचनको लय बिग्रनेछ। त्यसैले सबै पक्षले आचारसंहिताको जिम्मेवारीपूर्वक पालन गर्नु अत्यावश्यक छ।’
कोशी प्रदेशका आन्तरिक मामिला तथा कानुनमन्त्री इन्द्रमणी पराजुलीले प्रदेशको सुरक्षा व्यवस्था पूर्ण रूपमा सुदृढ रहेको बताए। उनले भने,‘निर्वाचन सफल पार्न सबैले उत्साहपूर्वक लाग्नुपर्छ। यसले मुलुकलाई राजनीतिक निकास दिने र संविधानको कार्यान्वयनमा महत्वपूर्ण भूमिका खेल्नेछ।’
प्रदेशका पर्यटन, वन तथा वातावरणमन्त्री भीम पराजुलीले आचारसंहिता अनुगमनका लागि छुट्टै संयन्त्र निर्माणको सुझाव दिए। प्रदेशका प्रमुख सचिव राजेन्द्रप्रसाद पौडेलले सबै दल र उम्मेदवारलाई आचारसंहिता पालनमा सहयोग गर्न जोड दिए।
