— आयरल्यान्डले ट्वान्टी-२० विश्वकप २०२६ अन्तर्गत शनिबार समूह 'बी'को खेलमा ओमानलाई सजिलै ९६ रनले पराजित गरेको छ ।
कोलम्बोमा भएको खेलमा ओमान जितका लागि २ सय ३६ रन पछ्याउने क्रममा १८ ओभरमा १ सय ३९ रन बनाएर अलआउट भएको थियो । उसका लागि ओपनर आमिर कलिम ५० र मोहम्मद मिर्जाले ४६ रन बनाए । उनीहरूलाई छाडेर अरु कसैले गतिलो योगदान दिन सकेनन् ।
आयरिस बलरमध्ये जोस लिटिलले १६ रनमा ३ विकेट लिए । त्यस अगाडि कप्तान लोर्कन टकर र गेराथ डेलानीबीच भएको शतकीय साझेदारीको मद्दतले आयरल्यान्डले पहिले ब्याटिङको निम्तो दिएपछि सम्हालिएर ५ विकेटमा २ सय ३५ रनको स्कोर खडा गरेको हो । एक समय आयरल्यान्डले ६४ रन बनाउँदासम्म ४ विकेट गुमाइसकेको थियो । त्यहींबाट टकर र डेलानीले आफ्नो टिमलाई सुदृढ स्थितितर्फ दोहोर्याए ।
उनीहरूले पाँचौं विकेटका लागि १ सय १ रनको ठोस साझेदारी गरे । डेलानी ५६ रन बनाएर आउट भए । उनले ३० बलमा ३ चौका र ४ छक्का प्रहार गरे । टकरले भने नटआउट रहेर ९४ रन बनाए । उनले ५१ बलमा १० चौका र ४ छक्का प्रहार गरे । ओमानी बलरमध्ये सकिल अहमदले ३३ रनमा तीन विकेट हात पारे । ओमानको यो लगातार तेस्रो हार हो र टिम शून्य अंकमा समूहको पुछारमा छ ।
