— अमेरिकाले ट्वान्टी-२० विश्वकपमा शुक्रबार नेदरल्यान्ड्समाथि ९३ रनको प्रभावशाली जित निकालेको छ ।
समूह 'ए'को चेन्नाईमा भएको खेलमा प्राप्त यो जितपछि अमेरिकाको दुई अंक भएको छ । नेदरल्यान्ड्सको भने यो दोस्रो हार हो । दुवै टिमले तीन खेल खेलको छन् र उनीहरूका लागि सुपर एटका यात्रा कठिन रहेको छ । जितका लागि १ सय ९७ रनको लक्ष्य पाएको नेदरल्यान्ड्स १५.५ ओभरमा १ सय ३ रन बनाएर अलआउट भयो ।
त्यसमा बास डे लिडले बनाएको २३ रन नै सर्वाधिक ठूलो स्कोर रह्यो । त्यसपछि कप्तान स्कट एडवार्ड्सले २० रन थपे । अमेरिकी बलरमध्ये हरमिन सिंहले २१ रनमा चार विकेट लिए । यस्तै, साड्लनी भानले तीन र मोहम्मद मोहसिनले दुई विकेट लिए । त्यस अगाडि नेदरल्यान्ड्सले टस जितेर पहिले अमेरिकालाई ब्याटिङको निम्तो दिएको थियो र त्यो धेरै हदसम्म ठिक साबित भएन ।
अमेरिकाले छ विकेटमा १ सय ९६ रनको सम्मानजनक स्कोर खडा गर्न सफल रह्यो । त्यसमा साइटेजा मुक्कामल्ले ५१ बलमा ७९ रन बनाए । उनले ५ चौका र ४ छक्का प्रहार गरे । यस्तै, शुभम रन्जनेले २४ बलमा ४८ रन जोडे । कप्तान मोनान्क पटेलले २२ बलमा ३६ बहुमूल्य रन जोडे । समूहमा भारत र पाकिस्तान चार चार अंकमा शीर्ष दुई स्थानमा छन् ।
