— चर्च ब्वाइज युनाइटेड २६ औं संस्करणको अन्तर्राष्ट्रिय आमन्त्रण बुढासुब्बा गोल्डकप फुटबल प्रतियोगिताको फाइनल प्रवेश गरेको छ ।
बिहीबार भएको अन्तिम सेमिफाइनलम खेलमा झापा ११ फुटबल क्लबलाई पेनाल्टी सुटआउटमा ३–१ गोल अन्तरले पराजित गर्दै चर्च ब्वाइज उपाधिनजिक पुगेको हो ।
धरान रंगशालामा भएको खेलमा चर्च ब्वाइजलाई उपाधिनजिक पुर्याउन गोलकिपर प्रमञ्जय गच्छदार नायक बने । उनले झापा ११ को तीन वटा पेनाल्टी प्रहारलाई बिफल तुल्याए ।
आरोण थापामगर, राजेश दाहाल र गौरब धिमालको प्रहार उनले रोके । प्रसान्त लक्समको प्रहार गोलमा परिणत भयो । चर्च ब्वाइजका सुमित श्रेष्ठको प्रहार झापाका सब्सिच्युट गोलकिपर मनोज गुरुङले रोके पनि एरिक बिष्ट, रोहन कार्की र सुदिप श्रेष्ठले सहजै गोल गरे ।
त्यसअघि निर्धारित समयको सुरुवाती तेस्रो मिनेटमा मिलन राईको गोलबाट चर्च ब्वाइजले अग्रता लिएको थियो । १६ औं मिनेटमा अबोयामी फकुन्लेले गोल थपेपछि चर्च ब्वाइजले अग्रता दोब्बर बनायो । चर्च ब्वाइजका अभिषेक लामाले २७ औं मिनेटमा आत्माघाती गोल गरेपछी झापाले अग्रता छोट्यायो ।
एरोन थापामगरले ६१ औं मिनेटमा फ्रिकिक मार्फत गोल गरेपछि खेल २–२ को बराबरीमा आयो । त्यसपछि कुनै टिमबाट थप गोल नभएपछि खेलको निर्णय सिधैं पेनाल्टी सुटआउटबाट लिइएको हो । खेलको म्यान अफ द म्याच प्रमञ्जय गच्छदार घोषित हुँदै नगद १० हजार पाए । लिग च्याम्पियन चर्च ब्वाइज युनाइटेडले उपाधिका लागि शनिबार प्लानिङ ब्वाइज युनाइटेडसाग प्रतिस्पर्धा गर्नेछ ।
यसअघि सम्पन्न पहिलो सेमिफाइनलमा प्लानिङ ब्वाइज युनाइटेडले पोखराको लालीगुराास एसोसिएसनलाई २–१ गोलअन्तरले पराजित गर्दै फाइनलमा स्थान सुरक्षित गरिसकेको छ । सुरुआती गोलले पछि परेको अवस्थामा समेत पुनरागमन जित निकाल्दै प्लानिङ ब्वाइज उपाधिनजिक पुगेको हो । प्रतियोगिताको विजेताले नगद १० लाख र उपविजेताले ५ लाख रुपैयाँ हात पार्नेछन् ।
