— अमेरिकी नाकाबन्दीका कारण क्युबामा इन्धन संकट भएको छ । यहाँ जेट विमानहरुमा भर्नका लागि इन्धन नभएपछि विभिन्न एयरलाईन्सहरु फ्लाइट स्थगित गर्न बाध्य छन् ।
एयर क्यानडा, वेस्ट जेट, ट्रान्स्याटलगायत एयरलाईनका विमान स्थगित भएका छन् । क्युवाको पर्यटन उद्योग संकटमा परेको छ ।
क्युबाले आफ्नो आवश्यकताको एक तिहाइ मात्र इन्धन उत्पादन गर्छ । इन्धन अभावले यहाँ बस र रेल सेवा कटौती, केही होटल बन्द र शैक्षिक संस्थानमा अध्ययन प्रभावित भएको छ ।
जेट इन्धन अभाव भएपछि रुसले यहाँ अलपत्र परेका आफ्ना नागरिकहरूका लागि उद्धार उडान सञ्चालन गर्ने भएको छ ।
रुसको संघीय विमान नियामक निकाय रोसाभियात्सियाले बुधबार वक्तव्य जारी उद्धार उडान सञ्चालन हुने जानकारी दियो । रुसको पर्यटन सञ्चालक संघका अनुसार क्युबामा करिब ५,००० रुसी पर्यटकहरू हुन सक्छन् ।
यसैगरी, रुसको आर्थिक विकास मन्त्रालयले नागरिकहरूलाई त्यहाँ नजान आह्वान गरेको छ । अमेरिकी सेनाले जनवरीमा भेनेजुएलाका राष्ट्रपति निकोलास मदुरोको अपहरण गरेपछि भेनेजुएलाबाट क्युवामा हुने इन्धन आपूर्ति रोकिएको छ । किनकी, अहिले भेनेजुएलाको पेट्रोल अमेरिकाको कब्जामा छ ।
क्युवाको मित्र देश रुसले अमेरिकी कदमको विरोध गरेको छ । क्रेमलिनका प्रवक्ता दिमित्री पेस्कोभले सोमबार मस्कोले हभानालाई आवश्यक सहयोग उपलब्ध गराउने विषयमा छलफल गरेको बताए ।
२०२५ मा १ लाख ३० हजारभन्दा बढी रुसीहरू क्युबा पुगेका थिए । क्यानडेली र क्यवेली मुलका आप्रवासीपछि क्युवामा सबैभन्दा धेरै रुसी पर्यटक जाने गरेका छन् ।
