— श्रीलंकाले ट्वान्टी-२० विश्वकप २०२६ मा बिहीबार समूह बी अन्तर्गत लगातार दोस्रो जित निकालेको छ । उसले पालेकेलेमा ओमानलाई सजिलै १ सय ५ रनको ठूलो अन्तरले हराएको हो ।
जितका लागि २ सय २६ को लक्ष्य पछ्याएको ओमानले ९ विकेट गुमाएर १ सय २० मात्र रन बनाउन सक्यो । यो जितपछि चार अंकमा श्रीलंका समूहको शीर्षमा उक्लेको छ र उसको सुपर एट प्रवेशको सम्भावना बलियो भयो ।
ओमानका लागि मोहमद नदिमले सर्वाधिक ५३ रन बनाए र नटआउट पनि रहे । यसअघि ओमानले टस जितेर पालेकेलेमा पहिले ब्याटिङको निम्तो दिएपछि श्रीलंकाले ५ विकेट गुमाएर २ सय २६ रनको लक्ष्य तयार पारेको हो । ओपनर जोडीले भने स्कोरमा खासै योगदान गरेनन् । पथुमा निसान्काले १३ र कमिल मिसराले ८ रन मात्रै बनाए । त्यसपछि इनिङ्स सम्हाल्ने काम कुसल मेन्डिस र पाभन रथानायेकेले गरे ।
उनीहरूले तेस्रो विकेटका लागि ९४ रनको साझेदारी गरे । रथनायकले ६० रन बनाए । उनले २८ बलमा आठ चौका र एक छक्का प्रहार गरे । यस्तै मेन्डिसले भने ४५ बलमा ६१ रन जोडे । रनआउट हुन अगाडि उनले ७ चौका प्रहार गरे । त्यसपछि कप्तान दसुन सनकाले २० बलमै ५० रन बनाए । उनको ब्याटबाट २ चौका र ५ छक्का निस्केको थियो ।
