— सोमालियाले साउदी अरेरिबयासँग सैन्य सहयोग सम्झौतामा हस्ताक्षर गरेको छ । सोमालियाका रक्षामन्त्री अहमद मोअल्लीम फिकी र उनका साउदी समकक्षी राजकुमार खालिद बिन सलमान बिन अब्दुलअजीजबीच सोमबार रियादमा समझदारीपत्रमा हस्ताक्षर भएको हो ।
सोमालियाको रक्षा मन्त्रालयले भनेको छ, “यो सम्झौताले दुई देशहरू बीचको रक्षा र सैन्य सहयोगको ढाँचालाई सुदृढ पार्ने उद्देश्य राखेको छ, र यसमा दुवै पक्षको रणनीतिक हितलाई पूरा गर्ने साझा हितका धेरै क्षेत्रहरू समावेश छन् ।’
राजकुमार खालिदले समाजिक सञ्जाल एक्समार्फत सम्झौता भएको बताएका छन् । तर, यस विषयमा बिस्तृत विवरण खुलाएका छैनन् । गत महिनात्रै सोमलिायले कतारसँग सुरक्षा सम्झौता गरेको थियो ।
सोमालियाबाट आफुलाई अलग घोषणा गरेको क्षेत्र सोमालिल्यान्डलाई गत डिसेम्बरमा इजरायलले नयाँ देशको मान्यता दिने घोषणा गरेको थियो । सोमालिल्यान्डलाई मान्यता दिने इजरायल विश्वकै पहिलो देश हो । इजरायलले यहाँ सैन्य अखडा खोलेर छिमेकी देशहरुमाथि आक्रमण गर्ने लक्ष्यले यस्तो काम गरेको आरोप सोमालियाले लगाउँदै आएको छ । सोमलियाका राष्ट्रपति हसन शेख मोहम्मदले. इजरायलको यस योजनालाई जसरी पनि विफल पारिने बताएका छन् ।
त्यसका लागि आफ्नो सुरक्षा अवस्था सुदृढ बनाउन क्षेत्रीय समर्थन खोजिरहेको छ । पूर्वी अफ्रिकी देश सोमलिया अरब लिगको सदस्य हो ।
यसैगरी सोमालियाले युएईसँगका सबै सम्झौताहरु गत महिना स्थगित गरेको थियो । जसमा बन्दरगाह सञ्चालन र सुरक्षा सम्झौता पर्छन् । सोमालिल्यान्डको स्वतन्त्रतालाई मान्यता दिने इजरायलको कदमलाई युएईले सहयोग गरेको सोमालियाको आरोप थियो ।
यसअघि सन् २०२० मा युएईले इजरायलसँग सन्धी गरेको सम्बन्ध सुधारेको थियो । डिसेम्बरमा अरब इस्लामिक देशहरुले सोमालिल्यान्डलाई मान्यता दिने इजरायको कदमको विरोधमा विज्ञप्ति निकाल्दा युएईले हस्ताक्षर गरेको थिएन । तर, गत जनवरीमा युएईले अफ्रिकी युनियनसँग मिलेर संयुक्त विज्ञप्ति निकाले थियो । यसमा सोमालियाको सार्वभौमसत्ता, भौगोलिक अखण्डता, सुरक्षा र स्थायित्वलाई सम्मान गर्ने उल्लेख छ ।
