— आयोजक धरान फुटबल क्लब २६ औं संस्करणको अन्तराष्टिय आमन्त्रण बुढासुब्बा गोल्डकपको क्वाटरफाइनल चरणबाटै बाहिरिएको छ ।
सोमबार भएको तेस्रो क्वाटरफाइनलमा पोखराको लालीगुराँस फुटबल एसोसियसन क्लब पोखरासँग पेनाल्टी सुटआउटमा ५–४ गोल अन्तरले पराजित हुँदै आयोजक टिम क्वाटरफाइनल चरणबाटै बाहिरिएको हो।
धरान रंगशालामा भएको खेलको निर्धारित ९० मिनेटको समयमा दुबै टिमबाट गोल हुन नसकेपछि खेल अतिरिक्त समयमा धकेलिएको थियो । समय अभावका कारण १५ मिनेट मात्रै थपिएको अतिरिक्त समयमा पनि कुनै टिमले गोल नगरेपछि खेलको निर्णय पेनाल्टी सुटआउटबाट लिइएको हो ।
पेनाल्टी सुटआउटमा धरानका कप्तान दोर्जे तामाङको प्रहार लालीगुराँसका गोलकिपर कुम्ब देउवाले रोकेपछि लालीगुराँसले सेमिफाइनल स्थान सुरक्षित गरेको हो ।
देउवाले खेलको म्यान अफ द म्याच घोषित हुँदै नगद १० हजार रुपैयाँ पुरस्कार पाए । धरानका नगेन राई, प्रज्वल थापा, विवेक राई र सबिन राईको प्रहार गोलमा परिणत भयो । लालीगुराँसका राम थापा, अबुल युसुफ हाउले, टीकाराज गुरुङ, आशिष गुरुङ र सुदिप गुरुङ पाँचै जनाको प्रहार गोलमा परिणत भएपछि पहिलो सहभागितामै जित हात पार्न सफल भयो ।
यसअघि उद्घाटन खेलमा पाहुना टोली जर्जियन फुटबल क्लब भारतलाई पेनाल्टी सुटआउटमा ४–२ गोल अन्तरले पराजित गर्दै क्वाटरफाइनल खेलेको धरानले लालीगुराँसबिरुद्ध गतिलो प्रदर्शन गर्न नसक्दा अघिल्लो चरणको यात्रा तय गर्न असफल भयो ।
भर्खरै ए डिभिजन लिगमा उक्लिएको पोखरेली टिम लालीगुराँसले सिधै बाई पाएर क्वाटरफाइनल खेलेको हो। लालीगुराँसले अब सेमिफाइनलमा अर्को नवप्रवेशी ए डिभिजन क्लब प्लानिङ ब्वाइज युनाइटेडसँग बुधबार प्रतिस्पर्धा गर्नेछ । त्यसअघि मंगलबारको अन्तिम क्वाटरफाइनल खेल झापा ११ फुटबल क्लब र सातदोबाटो युथ क्लब ललितपुर बीच प्रतिस्पर्धा हुनेछ ।
झापा ११ ले दोस्रो प्रि–क्वाटरफाइनल खेलमा टोली रोयल थिम्पु फुटबल क्लब भुटानलाई पराजित गर्दै क्वाटरफाइनलमा पुगिसकेको छ भने सातदोबाटोले सिधै बाई पाएर अन्तिम आठमा प्रतिस्पर्धा गर्न लागेको हो। फागुन २ गतेसम्म सञ्चालन हुने प्रतियोगिताको विजेता टोलीले नगद १० लाख रुपैयाँ प्राप्त गर्नेछ भने उपविजेता टोलीले ५ लाख रुपैयाँ पुरस्कार पाउनेछ।
