। आईसीसी टी-२० विश्वकप २०२६ मा सहआयोजक श्रीलंकाले विजयी सुरुवात गरेको छ ।
आइतबार राति सम्पन्न समूह ‘बी’ अन्तर्गतको खेलमा श्रीलंकाले आयरल्यान्डलाई २० रनले पराजित गरेको हो । श्रीलंकाले दिएको १६४ रनको लक्ष्य पछ्याएको आयरल्यान्ड १ बल बाँकी छँदा १४३ रनमा अलआउट भयो ।
ह्यारी टेक्टरले सर्वाधिक ४० रन बनाए । रस अडेयरले ३४ रन बनाए । लोर्कन टकरले २१ रन बनाए ।
श्रीलंकाका लागि महीश थिक्साना र वानिन्दु हसरंगाले ३-३ विकेट लिँदा मथिसा पथिरानाले २ विकेट लिए भने दुशमान्था चमीरा र दुनिथ वेलालगेले १-१ विकेट लिए ।
त्यसअघि टस हारेर पहिले ब्याटिङको निम्तो पाएको श्रीलंकाले २० ओभरमा ६ विकेट गुमाएर १६३ रन बनाएको थियो । कुसल मेन्डिसले अविजित ५६ रन बनाए भने कामिन्दु मेन्डिसले ४४ रन बनाए ।
आयरल्यान्डका लागि बेरी मेकार्थी र जर्ज डकरेलले २-२ विकेट लिए भने मार्क अडेयर र गारेथ डेलानीले १-१ विकेट लिए ।
आजै भएको समूह ‘डी’ अन्तर्गतको खेलमा न्युजिल्यान्डले अफगानिस्तानलाई ५ पराजित गरेको छ । अफगानिस्तानले दिएको १८३ रनको लक्ष्य न्युजिल्यान्डले १७.५ ओभरमा ५ विकेटको क्षतिमा पूरा गरेको थियो ।
टिम सेइफर्टले ६५ तथा ग्लेन फिलिप्सले ४२ रन बनाए । मार्क चापमानले २८ रन बनाउँदा डारिल मिचेल २५ अनि कप्तान मिचेल सान्टनर १७ रनमा अविजित रहे ।
त्यसअघि गुल्बादिन नाइबको अर्धशतकमा अफगानिस्तानले २० ओभरमा ६ विकेट गुमाएर १८२ रन बनाएको थियो ।
