: राष्ट्रिय स्वतन्त्र पार्टी (रास्वपा) का वरिष्ठ नेता बालेन शाहको डेराकोठामा चोरी गरेको आरोपमा तीनजनालाई प्रहरीले पक्राउ गरेको छ। जिल्ला प्रहरी परिसर काठमाडौंको विशेष टोलीले उनीहरूलाई विभिन्न मिति र स्थानबाट नियन्त्रणमा लिएको हो।
पक्राउ परेकाहरूको साथबाट नक्कली गरगहना तथा अन्य सामग्री समेत बरामद गरिएको प्रहरीले जनाएको छ।
पक्राउ पर्नेमा काठमाडौं बालाजु हाइट बस्ने ४२ वर्षीय मनिष राजवहाक,सिन्धुपाल्चोकको लिसंखुपाखर गाउँपालिका–६ पड्कु घर भई हाल काठमाडौंको गैरीगाउँ बस्ने ४६ वर्षीय खिमबहादुर खड्का तथा डोटीको दिपायल सिलगढी नगरपालिका–६ घर भई हाल धादिङको धुनिबेशी नगरपालिका–७ खानीखोला बस्ने ४५ वर्षीय संजय श्रेष्ठ रहेका छन्।
प्रहरीका अनुसार उनीहरू यसअघि पनि विभिन्न आपराधिक गतिविधिमा संलग्न रहेको खुलेको छ।
पक्राउ परेकामध्ये मनिष राजवहाक गत भदौ २४ गते ‘जेनजी आन्दोलन’का क्रममा नख्खु कारागारबाट फरार भएका थिए। फरार भएयता उनले काठमाडौंका पाँच स्थानमा चोरी गरेको तथ्य खुल्न आएको प्रहरीले जनाएको छ।
यस्तै,खिमबहादुर खड्का बैंकिङ कसूर मुद्दाका फरार अभियुक्त हुन् भने संजय श्रेष्ठ जबरजस्ती करणी मुद्दाका आरोपित रहेको प्रहरीको भनाइ छ। प्रहरीले घटनाबारे थप अनुसन्धान भइरहेको जनाएको छ।
