: नेपाली कम्युनिष्ट पार्टी (नेकपा) का नेता माधव सापकोटाले पछिल्लो समय राजनीति वृत्तमा सिर्जना गर्न खोजिएको ‘सबै पार्टी र उम्मेदवार उस्तै हुन्’ भन्ने भाष्य गलत भएको बताएका छन् ।
काठमाडौंमा शुक्रबार आयोजित चुनाव प्रचारप्रसार कार्यक्रममा बोल्दै नेता सापकोटाले सामाजिक सञ्चालहरुमार्फत यस्ता भ्रम चिर्न पार्टी कार्यकर्ताहरुलाई निर्देशन दिए । उनले दलहरुलाई एउटै डालोमा राखेर हेर्नु न्यायसंगत नहुने समेत बताए। नयाँ शक्ति भनिएको राष्ट्रिय स्वतन्त्र पार्टीलाई लक्षित गर्दै नेता सापकोटाले भने, ‘मनग्य पैसा कमाएर, धन दौलत जम्मा गरेर केवल पद र प्रतिष्ठाको आशक्तिमा आएका घण्टी बजाउनेहरू हामी होइनौं ।’
नेता सापकोटाले नयाँ दलका उम्मेदवारहरुलाई कुन सरकारी कार्यालय कहाँ छन् भन्ने आधारभूत जानकारी समेत नभएको भन्दै व्यङय समेत गरे । सबै उस्तै हुन भन्ने गरी सिर्जना गरिएको भाष्य उहिले रेडियोमा बज्ने ‘हात्ती छाप चप्पल र छात्ती कुन बलियो ?’ भन्ने विज्ञापन जस्तै भएको टिप्पणी गरे। पार्टीका तर्फबाट विगतमा भएका गल्ती–कमजोरीहरु स्वीकार्दै नेता सापकोटाले आत्मालोचनाका लागि आफ्नो पार्टी तयार रहेको बताए। उनले हरेक दिन एउटा पोस्ट लेखेर विरोधी भाष्यको खण्डन गर्न समेत कार्यकर्ताहरुलाई आह्वान गरे।
