— उच्च अदालत सुर्खेतले चालु आर्थिक वर्षको ६ महिनामा ५३.१ प्रतिशत मुद्दा फर्स्योट गरेको छ । आर्थिक वर्ष साउनदेखि पुस मसान्तसम्म ३ सय ५९ वटा मुद्दा फर्स्योट गरेको हो ।
चालु आर्थिक वर्षमा दर्ता भएका र गत आर्थिक वर्षबाट जिम्मेवारी सरेर आएका कुल ५ सय ६४ मुद्दामध्ये पुस मसान्तसम्म २ सय ५ मुद्दा फर्स्योट हुन बाँकी रहेको अदालतका प्रवक्ता निमित्त रजिष्ट्रार प्रेमप्रकाश थापाले जानकारी दिए । उनका अनुसार मेलमिलाप हुन सक्ने प्रकृतिका १ सय ३४ मुद्दामध्ये ३२ प्रतिशत मुद्दा मेलमिलापको माध्यमबाट फर्स्योट गरिएको छ ।
उच्च अदालत सुर्खेत मातहत रहेका जिल्ला अदालतहरूमध्ये जाजरकोट जिल्ला अदालत जाजरकोटबाट ३४.९६ प्रतिशत, दैलेख अदालतबाट ६३.६३ प्रतिशत, रुकुम पश्चिम दालतबाट ३४.३२ प्रतिशत, सल्यान अदालतबाट ५५.२८ प्रतिशत र सुर्खेत अदालतबाट ३८.९७ प्रतिशत मुद्दा फर्स्योट भएको प्रवक्ता थापाले जानकारी दिए ।
थापाका अनुसार चालु आर्थिक वर्षको ६ महिनामा उच्च अदालत सुर्खेत मातहतका जिल्ला अदालतहरूबाट २ करोड ५ लाख ५४ हजार ६ सय ६ रुपैयाँ जरिवाना फर्स्योट भएको छ । यी अदालतबाट जम्मा जरिवाना रकममध्ये २५ करोड ७५ लाख ९२ हजार ५ सय ६५ रुपैयाँ फर्स्योट गर्न बाँकी रहेको उनले बताए ।
उच्च अदालत सुर्खेतका मुख्य न्यायाधीश हरिप्रसाद भण्डारीले सर्वोच्च अदालतको तेस्रो पञ्चवर्षीय रणनीति अनुसार सुर्खेत उच्च अदालतले काम गरिरहेको बताए । उनले जनस्तरमा सचेतना बढेकाले पछिल्लो समय मुद्दा दर्ताको संख्या पनि बढेको बताए । ‘अदालतमा मुद्दा धेरै पर्नु खुसी हुनुपर्ने विषय होइन, तर जनस्तरमा कानुनी साक्षरता बढेका कारण न्यायका लागि न्यायालयसम्म पुग्नु सकारात्मक छ,' उनले भने ‘उच्च अदालत मातहतका जिल्ला अदालतबाट कैद र जरिवानाको फर्स्योट अवस्था सन्तोषजनक छ ।'
