— इरानमा जारी सरकार विरोधी प्रदर्शनमा संलग्न रहेकाे आराेपमा १३९ विदेशी नागरिक पक्राउ परेका छन् ।
इरानको तस्निम समाचार एजेन्सीले याजद सहरका प्रहरी प्रमुखलाई उद्धृत गर्दै पक्राउ परेका व्यक्तिहरू विरोध गर्ने, उक्साउने र निर्देशन दिने काममा संलग्न रहेको तथा देश बाहिरका सञ्जालहरूसँग सम्पर्कमा रहेर आपराधिक क्रियाकलाप गरेको जनाएको छ ।
यद्यपि, पक्राउ परेका व्यक्तिहरूको राष्ट्रिय पहिचान भने खुलाइएको छैन । प्रदर्शनकारीहरूसँग सम्बन्धित मुद्दाहरूको समीक्षाको क्रममा पक्राउ परेकामध्ये १३९ जना विदेशी नागरिक भएको निष्कर्ष निकालेको प्रहरी प्रमुख अहमद नेगाहबानले बताए ।
तेहरानले प्रदर्शनको क्रममा हालसम्म तीन हजारभन्दा बढीको मृत्यु भएको स्वीकार गरेको छ भने हिंसाको श्रेय आतङ्कवादी कार्यहरूलाई दिँदै अधिकांश पीडितहरुमा सुरक्षा बलका सदस्य र निर्दोष व्यक्तिहरू रहेको बताएको छ ।
गैरसरकारी संस्था, द ह्युमन राइट्स एक्टिभिष्ट न्यूज एजेन्सीले भने ६ हजार ८५४ जनाको मृत्यु भएको पुष्टि गरेको छ । जसमा अधिकांश प्रदर्शनकारीहरू सुरक्षा बलद्वारा मारिएका छन् । यसैबीच अन्य अधिकार समूहहरूले मृत्यु हुनेको सङ्ख्या धेरै हुन सक्ने अनुमान गरेका छन् ।
