— सन् २०२४ को सुरुमा एप्पललाई उछिन्दै विश्वकै सबैभन्दा मूल्यवान् कम्पनी बनेको माइक्रोसफ्ट केही सातायता निरन्तर दबाबमा छ । गत बिहीबार कम्पनीले एकै दिन करिब ४ खर्ब अमेरिकी डलर गुमाएको थियो ।
मानव बेचबिखन तथा बाल यौन अपराधी ठहर भएका जेफ्री एप्स्टिनसँग जोडिएका फाइलमा माइक्रोसफ्टका संस्थापक बिल गेट्सको नाम रहेको खबरपछि कम्पनीको छविमा थप नकारात्मक प्रभाव परेको छ ।
पछिल्लो त्रैमासिकको आम्दानी र खर्च विवरण सार्वजनिक भएपछि माइक्रोसफ्टको क्लाउड कारोबारको वृद्धिदर अपेक्षाभन्दा सुस्त देखिएको छ । एआई पूर्वाधारमा बढ्दो लगानी र त्यसले बढाएको लागतका कारण लगानीकर्ताहरू सचेत बन्दा कम्पनीको सेयर मूल्यमा गिरावट आएको छ । यही पृष्ठभूमिमा अमेरिकी न्याय मन्त्रालयले सार्वजनिक गरेको जेफ्री एप्स्टिनसम्बन्धी नयाँ कागजातले संस्थापकसँग जोडिएका पुराना विवाद चर्चामा आउँदा बजारमा नकारात्मक भावना थपिएको ब्लुमबर्गका विश्लेषक जेम्स सेफार्टको धारणा छ ।
कम्पनीले सार्वजनिक गरेको आम्दानी विवरणमा ‘आज्यर क्लाउड’ सेवाको वृद्धिदर अघिल्लो त्रैमासिकको तुलनामा केही कमजोर देखिएको छ । साथै, एआई डेटा सेन्टर र चिप्समा भइरहेको उच्च पुँजीगत खर्चले निकट अवधिमा मार्जिनमा दबाब पर्ने संकेत व्यवस्थापनले दिएको छ । उच्च ब्याजदर, ठूला प्रविधि र त्यसमा पनि एआई कम्पनीको मूल्यांकनबारे लगानीकर्तामा बढ्दो सावधानी र नाफा बुकिङका कारण पनि माइक्रोसफ्टसहित अन्य ठूला टेक सेयरमा बिक्री दबाब देखिएको हो । अक्टोबर २०२५ आसपास झन्डै ३९ खर्ब अमेरिकी डलर बजार मूल्य रहेको माइक्रोसफ्ट सोमबार ३१ खर्ब अमेरिकी डलर मूल्यसहित विश्वकै चौथो ठूलो कम्पनीका रूपमा भने कायम छ ।
यसैबीच, अदालतको आदेशअनुसार सार्वजनिक गरिएका लाखौं पृष्ठका एप्स्टिन फाइल्समा माइक्रोसफ्टका सहसंस्थापक बिल गेट्सको नाम पटक–पटक उल्लेख भएको अमेरिकी सञ्चारमाध्यमले जनाएका छन् । ती कागजातमा विभिन्न क्यालेन्डर इन्ट्री, अन्य व्यक्तिबीच भएको कुराकानीका सन्दर्भ र एप्स्टिनले आफैं तयार पारेका तर नपठाइएका ड्राफ्ट इमेलहरू समावेश छन् । ती ड्राफ्टमध्ये केहीमा गेट्सको व्यक्तिगत जीवनबारे आधारहीन र आपत्तिजनक दाबी गरिएको समाचार माध्यमले जनाएका छन् ।
कतिपय इमेल ड्राफ्टमा बिल गेट्स एप्स्टिनको निजी टापुमा जाँदा रुसी केटीहरूबाट यौनजन्य रोग सरेको आरोपसमेत उल्लेख छ । ती इमेलहरू गेट्सलाई पठाइएको वा प्राप्त भएको कुनै प्रमाण भने सार्वजनिक दस्ताबेजमा सामेल छैनन् । द न्यु योर्क टाइम्सलाई दिएको प्रतिक्रियामा गेट्सका प्रतिनिधिले ती आरोपलाई पूर्ण रूपमा झूटो भन्दै अस्वीकार गरेका छन् । इमेल कुराकानीमा आएका प्रसंग एप्स्टिनले सम्बन्धबारे बढाइचढाइ गरेर प्रभाव जमाउन गरेको प्रयास मात्र भएको ती प्रतिनिधिले बताएका छन् ।
गेट्सले यसअघि नै सीएनएन, पीबीएसलगायतसँगका अन्तर्वार्तामा एप्स्टिनसँग भेट्नु र उनीसँग समय बिताउनु गल्ती भएको स्वीकार गर्दै यस सम्बन्धप्रति पश्चात्ताप रहेको बताएका छन् । तर फ्लाइट लगबुकमा उल्लेख भए पनि गेट्स एप्स्टिन टापु पुगेको प्रमाणित हुने कुनै तस्बिर वा विवरण भने सामेल छैनन् ।
यसै साता सार्वजनिक फाइल्समा पिटर थिएल र इलन मस्कजस्ता प्रविधि क्षेत्रका अन्य व्यक्तिको नाम पनि देखिन्छ तर प्रायः भेटघाटको तालिका वा कुनै अन्य व्यक्तिका इमेलमा उल्लेख भएका रूपमा मात्र नाम उल्लेख छन् । ती कागजातले कसैको पनि आपराधिक गतिविधि वा संलग्नता भने पुष्टि नगर्ने मस्कको दाबी छ ।
माइक्रोसफ्टले सेयर उतारचढावलाई एप्स्टिन फाइल्ससँग जोडेर कुनै प्रतिक्रिया दिएको छैन । विश्लेषकहरूका अनुसार हालको गिरावट मुख्यतः आम्दानी, समग्र एआई बबलको दबाब र बजार अवस्थाबाट प्रेरित भए पनि हाई–प्रोफाइल व्यक्तिसँग जोडिएका शीर्षकहरूले छोटो अवधिमा लगानीकर्ताको भावनालाई प्रभावित गर्न सक्नेछ । (एजेन्सीको सहयोगमा)
