— लिबियाका दिवंगत नेता मुअम्मर गद्दाफीका छोरा सैफ अल–इस्लाम गद्दाफीको हत्या भएको छ । मंगलबार पश्चिमी लिबियाको सहर चिन्तानमा उनको आवासमा घुसेर आक्रमणकारीले गोली हानेर हत्या गरेका हुन् ।
सैफ अल–इस्लामको राजनीतिक टिमले भने अहिलेसम्म यसबारे पुष्टि गरेको छैन । घटना मंगलबार दिउँसो भएको बताइएको छ । चार जना मास्क लगाएका आक्रमणकारीले घरमा घुसेर आक्रमण गरेका थिए ।
अन्तर्राष्ट्रिय सञ्चार माध्यमहरुका अनुसार आक्रमणकारीले पहिला घरमा लगाइएको सीसीटीभी क्यामेरा नष्ट गरेका थिए । त्यसपछि घरभित्र छिरेर इस्लामको हत्या गरेका थिए । इस्लामका राजनीतिक टिमका सदस्य अब्दुल्लाह ओथमान अब्दुर्रहीमले सामाजिक सञ्जाल फेसबूकमा यसको जानकारी दिएका छन् ।
उनले यस आक्रमणलाई कायरतापूर्ण र विश्वासघाती हत्या भएका छन् । सैफ अल–इस्लामको राजनीतिक टिमले लिबियाको न्यायपालिका र अन्तर्राष्ट्रिय समुदायसँग घटनाको गम्भीर रुपमा अनुसन्धान हुनुपर्ने माग गरेको छ ।
हाल त्रिपोली र जिन्तानका स्थानीय अधिकारीहरुले घटनाको आधिकारिक पुष्टि भने गरेका छैनन् । तर लिबियाका सञ्चार माध्यम र अन्तर्राष्ट्रिय एजेन्सीहरुले सैफको हत्याबारे सामाचार प्रकाशित गरेका छन् ।
सन् २०११ मा नाटो समर्थित विद्रोहपछि मुअम्मर गद्दाफीको हत्या गरिएको थियो । त्यसबेला सैफ अल–इस्लामलाई उनका पिताको सम्भावित उत्तराधिकारी मानिएको थियो । उनी लिबियाको राजनीतिमा प्रभावशाली थिए । विद्रोहका क्रमा पनि इस्लाम सक्रिय थिए । विद्रोहपछि जिन्तानमा इस्लामलाई पक्राउ गरिएको थियो । कैयौं वर्षसम्म उनले जेल बिताए ।
२०१७ मा उनको रिहाई भयो । त्यसयता उनी जिन्तानमै बस्दै आएका थिए । सन् २०२१ मा उनले राष्ट्रपति निर्वाचन लड्ने प्रयास गरेका थिए । तर कैयौं विवादका कारण चुनावी प्रक्रिया नै रोकिएको थियो ।
