— बाह्रै मास हिउँले ढाकिने अन्टार्टिका महादेशमा नेपाली पोसाक दौरा-सुरुवाल लगाएर म्याराथन पूरा गरी नेपाली मूलका अमेरिकी धावक बाल जोशीले कीर्तिमान कायम गरेका छन् ।
जोशीले वर्ल्ड म्याराथन च्यालेञ्जअन्तर्गत शनिबार अन्टार्टिकामा सम्पन्न पहिलो म्याराथन पूरा गरेर कीर्तिमान कायम गरेका हुन् । उनी दौरा-सुरुवाल लगाएर अन्टार्टिकामा म्याराथन पूरा गर्ने पहिलो धावक पनि बनेका छन् ।
अन्टार्टिकाको कठ्यांग्रिँदो माइनस २० डिग्री तापक्रममा शनिबार बिहान जोशीले ४२ किमि लामो म्याराथन पूरा गरे । नेपाली पोसाकमा हिउँमा कुदेका जोशीले अन्त्यमा अमेरिकी र नेपाली झण्डा फहराएका थिए ।
अन्टार्टिकाको समयअनुसार बिहान ३ बजे म्याराथन सुरु भएको थियो । हिउँमा दौरा-सुरुवाल लगाएर दौडिनु असम्भव मानिएको यो दौड उनले सहजै पूरा गरेको बताए ।
शनिबार अन्टार्टिकाबाट सुरु भएको वर्ल्ड म्याराथन च्यालेञ्ज ‘७७७’ को पहिलो शृंखलामा ३२ देशका ५६ धावक सहभागी थिए, जसमध्ये जोशी एक हुन् ।
२०१५ मा देखि हरेक वर्ष सञ्चालन हुँदै आएको यो म्याराथन अत्यन्त चुनौतीपूर्ण मानिन्छ । सात उद्देश्यसहित सातै महादेशमा सात दिनसम्म लगातार सञ्चालन हुने यो म्याराथनलाई ७७७ म्याराथन भनिन्छ ।
नेपाली सम्पदा र संस्कृतिको विश्वव्यापी प्रचारका लागि वर्ल्ड म्याराथनमा दौरा-सुरुवाल लगाएर दौडिएको जोशीले बताए । अन्टार्टिकाको म्याराथन पूरा गरेर अफ्रिकाको केप टाउन पुगेका जोशी १ फेब्रअरी (आइतबार) त्यहाँ सञ्चालन हुने म्याराथनमा सहभागी हुनेछन् ।
अन्टार्टिकाबाट सुरु भएको म्याराथन सातौं दिनमा अमेरिकाको मायामीमा समापन हुने छ । अन्टार्टिकामा पहिलो (३१ जनवरी), अफ्रिकाको केप टाउनमा दोस्रो (१ फेब्रुअरी), अष्ट्रेलियाको पर्थमा तेस्रो (२ फेब्रुअरी) एसियाको दुबईमा चौथो (३ फेब्रुअरी), स्पेनको म्याड्रिडमा पाँचौं (४ फेब्रुअरी) ब्राजिलमा छैटौं (५ फेब्रुअरी) र अमेरिकाको मायामीमा सातौं तथा अन्तिम म्याराथन (६ फेब्रुअरी) मा सञ्चालन हुनेछ ।
सुर्खेतमा जन्मिएका ४१ वर्षीय जोशी दुई दशकदेखि अमेरिकामा छन् । टेक्सासको ड्यालस फोर्टवर्थ मेट्रोप्लेक्सको ग्रेपभाइन सिटीमा बस्ने जोशी पेसाले बैंकर्स हुन् ।
स्वस्थ रहन दौडिन थालेका जोशी २०२१ देखि सामाजिक कार्य र मानव कल्याणका निम्ति दौडिँदै आएको बताउँछन् । जोशी यसअघि संसारका विभिन्न देशमा आयोजित झण्डै दुई दर्जनभन्दा बढी म्याराथनमा सहभागी भइसकेका छन् ।
