— चिनियाँ नयाँ वर्षको अवसरमा शनिबार दशरथ रंगशालामा आयोजित मैत्रीपूर्ण खेलमा नेपाली राष्ट्रिय यू–२० टोलीले युनान प्रान्तीय युवा टोली चीनविरुद्धको ३–१ को जित पाएको छ ।
अन्तिम समयमा तीन गोल गरेपछि नेपाली यू–२० टोलीले जित हात पारेको हो । पहिलो हाफमा एक गोलले पछि परेको स्थितिमा नेपालबाट सुक्रिया मिया, कप्तान बिर्सना चौधरी र सजनी स्याङ्तानले गोल गरेका थिए ।
खेलको ४१ औं मिनेटमा शी सियाउतिङले गोल गर्दै युनान युथलाई अग्रता दिलाएकी थिइन् । नेपालबाट सुक्रियाले ८४ औं मिनेटमा बराबरी गोल गरिन् ।
कप्तान बिर्सनाले ८७ औं मिनेटमा गोल थप्ता नेपाल अग्रता बनाउन सफल भयो । वैकल्पिक खेलाडी सजनीले इन्ज्युरी टाइमको पाँचौं मिनेटमा गोल गर्दै ३–१ ले नेपालको जित पक्का गरिन् ।
एन्फा, युनान विश्वविद्यालयको शारीरिक शिक्षा संकाय तथा नेपाल ओभरसिज चिनियाँ संघको सयुक्त आयोजनामा तथा चिनियाँ राजदूतावास र राष्ट्रिय खेलकुद परिषद्को समन्वयमा मैत्रीपूर्ण खेल भएको हो ।
खेलअघि नेपाल र चीनका सांस्कृतिक विविधता झल्काउने सांस्कृतिक प्रस्तुति दिइएको थियो । चीनबाट ड्रागन नृत्य र नेपालबाट पञ्चेबाजाको विशेष प्रस्तुतिरहेको थियो ।
