— विभिन्न कामका लागि अमेरिका पुग्ने नेपालीले अब त्यहाँका नागरिकले पाउने सहुलियत उपभोग गर्न नपाउने भएका छन्।
अमेरिकी राष्ट्रपति डोनाल्ड ट्रम्पको सरकारले पछिल्लो समय आप्रवासीहरूलाई लक्षित गर्दै अनुदार नीति अख्तियार गरेपछि नयाँ नियम लागू भएको हो। हाललाई आप्रवासी भिसा समेत बन्द गरेको अमेरिकाले स्वास्थ्य उपचार, आवास सुविधा, परिवार सहायता, शैक्षिक सहायता जस्ता सेवामा पाउने गरेको सहुलियत समेत बन्द गरेको हो।
अमेरिकास्थित नेपाली दूतावासका अनुसार अब ती कुनै पनि सेवा लिन विदेशी नागरिकले पाउने छैनन्। त्यसको प्रत्यक्ष असर नेपालीलाई पनि पर्ने भएको हो। अध्ययन, भ्रमण, रोजगारी, व्यवसाय तथा परिवार वा आफन्त भेटघाट इत्यादिको सिलसिलामा धेरै नेपाली अमेरिका जाने गरेका छन्। त्यहाँ पुगेका उनीहरुले अमेरिकी सरकारका सहुलियतपूर्ण सेवा लिने गरेका थिए।
दूतावासका अनुसार अब गलत सूचना दिएर ती सेवा लिए भिसा, ग्रिनकार्ड समेत रद्द हुने छ। ‘अध्ययन, भ्रमण, रोजगारी, व्यवसाय तथा परिवार वा आफन्त भेटघाट इत्यादिको सिलसिलामा संयुक्त राज्य अमेरिकामा रहेको कुनै विदेशी नागरिक अमेरिकामा रहँदा अवैधानिक तवरले वा गलत सूचना वा विवरण पेश गरी अमेरिकी सरकारले आफ्ना नागरिकहरूका लागि उपलब्ध गराउने गरेको सहुलियतपूर्ण स्वास्थ्य उपचार सुविधा, आवास सुविधा, परिवार सहायता, शैक्षिक सहायता जस्ता कुनैपनि सुविधा वा सहायता माथि निर्भर भए गरेको पाइएमा त्यस्तो कार्यमा संलग्न व्यक्तिको भिसा वा ग्रिनकार्ड स्टाटसमा सोझै असर पर्ने र रद्द समेत हुने जानकारी सम्बन्धित अमेरिकी अधिकारीहरूबाट प्राप्त भएको छ,’ दूतावासले आफ्नो सूचनामा भनेको छ, ‘विभिन्न प्रयोजनमा अमेरिका गएका नेपालीहरूमध्ये सन् २०२४ मा गएकाहरूको तथ्यांकले मात्रै पनि नेपाली नागरिकहरू अमेरिकी सरकारका सहुलियतपूर्ण सेवा लिनेहरूको माथिल्लो सूचीमा रहेका पाइएकोले नेपालीका लागि हाललाई आप्रवासी भिसा बन्द गरेको सम्बन्धमा अमेरिकाले सार्वजनिक सूचना नै जारी गरेको छ।’
गलत सूचना दिएर सहुलियत लिने कामले नेपालप्रति अमेरिकी सरकारको भिसा नीति अझ कडा हुन सक्ने भन्दै दूतावासले त्यसप्रति सचेत गराएको छ। ‘अतः विभिन्न उदेश्यले संयुक्त राज्य अमेरिकामा रहनुभएका नेपाली नागरिकहरूले संयुक्त राज्य अमेरिकामा रहँदा गैरकानूनी तवरले वा गलत सूचना वा विवरण पेश गरी सहुलियतपूर्ण स्वास्थ्य उपचार सुविधा, आवास सुविधा, परिवार सहायता, शैक्षिक सहायता जस्ता कुनै पनि सुविधा/सहायतामाथि निर्भर नहुन/नगराउनुहुन, साथै बी१/बी२ भिसाको दुरुपयोग नगर्नुहुन सम्बन्धित सबैमा हार्दिक अनुरोध गरिन्छ ,’ सूचनामा भनिएको छ ।
पहिले नै भिसा बन्ड नतिर्न आग्रह
यसै गरी बी१/बी२ (व्यवसाय/पर्यटन) भिसामा अमेरिका गएका नेपालीहरू अमेरिकामा ओभरस्टे गरेको र तोकिएको भन्दा फरक काममा संलग्न भएको भन्दै नेपालीहरूलाई धरौटी (भिसा बन्ड) राख्नुपर्ने नियम समेत लगाएको छ।
अमेरिकाले गत २१ जनवरी २०२६ देखि लागू हुने गरी बी१/बी२ भिसा आवेदनमा धरौटी राख्नपर्ने नियम लागू गरेको हो।अब यस्तो भिसा आवेदन दिन नेपालीले ५००० देखि १५००० सम्म अमेरिकी डलर जम्मा गर्नुपर्ने हुन्छ।
यसले अमेरिकी भिसा प्राप्त गर्ने बाटो झन कठिन बनाएको छ। यसैबीच नेपालस्थित अमेरिकी दूतावासले अग्रिम रूपमा भिसा बन्ड नतिर्न समेत सचेत गराएको छ। अन्तर्वार्ताअघि बन्ड तिर्दैमा भिसा स्वीकृत हुन्छ भन्ने सुनिश्चितता नभएको भन्दै दूतावासले त्यसो नगर्न नेपाली नागरिकलाई आग्रह गरेको हो।
‘अग्रिम रूपमा भिसा बन्ड नतिर्नुहोस्,’ दूतावासले सूचना जारी गर्दै भनेको छ, ‘अन्तर्वार्ताअघि बन्ड तिर्दैमा भिसा स्वीकृत हुन्छ भन्ने सुनिश्चित हुँदैन। यदि तपाईंले भिसा पाउनुभयो भने, अन्तर्वार्तापछि मात्र कन्सुलर अधिकृतले सही वेबसाइटको प्रत्यक्ष लिंकसहित बन्ड कसरी तिर्ने भन्ने निर्देशन दिनुहुन्छ।’
अन्तर्वार्ताअघि जम्मा गरेको धरौटी फिर्ता नहुने समेत सूचनामा उल्लेख छ।
