: प्रहरीले लुटपाटमा संलग्न गिरोहलाई पक्राउ गरेको छ। कागेश्वरी मनहरा नगरपालिका- ६, मूलपानीमा सुनको गरगहना लुटपाट गर्ने (स्न्याचिङ गर्ने ग्रुप) समूहलाई प्रहरीले पक्राउ गरेको हो।
जिल्ला प्रहरी परिसर काठमाडौंले बिहीबार पत्रकार सम्मेलन गरेर संगठित रूपमा लुटपाट गर्ने १० जनालाई पक्राउ गरेको जानकारी दिएको छ।
उक्त समूह जेनजी आन्दोलनपछि बनेको प्रहरीको अनुसन्धानबाट खुलेको छ। काठमाडौंका एसएसपी रमेश थापाका अनुसार उनीहरूमध्ये अधिकांश जेनजी आन्दोलनका क्रममा प्रहरी हिरासतबाट भागेका थुनुवा हुन्।
पक्राउ गर्ने क्रममा प्रहरीले गोलीसमेत चलाएको थियो। प्रहरीले चलाएको गोलीबाट घाइते भएका व्यक्ति प्रहरी वृत्त महाराजगञ्जबाट भागेको खुलेको एसएसपी थापाको भनाइ छ।
'उक्त समूह राति १२ बजेदेखि बिहान ४ बजेसम्म लुटपाटमा संलग्न हुने गरेका थिए। दिनभर ट्याक्सी तथा अन्य सवारी साधन चलाउने गर्थे। राति ९ बजेतिर उनीहरू भेला हुन्थे। भेला भएर खाना खाएपछि उनीहरू १२ बजेतिर लुटपाटमा जाने गरेका थिए,' एसएसपी थापाले भने।
उनीहरूको समूहले मोटरसाइकलमा तीन-तीन जना बस्ने बाटोमा हिँड्ने महिला तथा पुरुषले लगाएका गहना लुट्ने गरेका थिए। फुटपाथमा व्यापार गर्न बसेकाहरूलाई पनि उनीहरूले लुट्ने गरेको प्रहरीको अनुसन्धानबाट खुलेको छ।
विगत तीन महिनादेखि उक्त समूह त्यस क्षेत्रमा सक्रिय रहेको सूचना पाएपछि प्रहरीले अप्रेसन सुरु गरेको थियो। सो समूहलाई नियन्त्रणमा लिनका लागि जिल्ला प्रहरी परिसर, भद्रकालीले विशेष अप्रेसन टोली खटाएको थियो। बुधबार राति सोही टोलीले पिछा गर्ने क्रममा उनीहरू भागिरहेका थिए।
जिल्ला प्रहरी परिसरमा उनीहरूविरुद्ध ३० देखि ४० वटा जाहेरी तथा उजुरी परेको छ।
