: नेदरल्यान्ड्स महिला क्रिकेट टोली पहिलो पटक महिला टी-२० विश्वकपमा छनोट भएको छ। नेपालमा जारी आइसीसी महिला टी-२० विश्वकप ग्लोबल क्वालिफार्यसको सुपर सिक्स अन्तर्गत पहिलो खेलमा अमेरिकालाई हराउँदै विश्वकपका लागि छनोट भएको हो।
त्रिवी क्रिकेट मैदानमा अमेरिकालाई डीएलएस (डकवर्थ लुइस स्ट्रेन)को माध्यमबाट २१ रनले हराउँदै नेदरल्यानड्सले पहिलो पटक विश्वकपमा स्थान बनाएको हो। टस जितेर ब्याटिङ गरेको अमेरिकाले निर्धारित २० ओभरमा ७ विकेट गुमाउँदै १२९ रन बनाएको थियो।
अमेरिकाले दिएको १३० रनको विजयी लक्ष्य पछ्याएको नेदरल्यान्ड्सले १२ ओभरमा २ विकेटको क्षतिमा ९० रन बनाएको हो। त्यसपछि भने वर्षा सुरु हुँदा खेलको नतिजा डीएलएस माध्यमबाट गरिएको थियो।
नेदरल्यान्ड्ससँगै बंगलादेश महिला क्रिकेट टिमले पनि विश्वकप २०२६ मा स्थान बनाएको छ। नेदरल्यान्ड्सले समूह चरणबाट ४ अंक लिँदै सुपर सिक्समा आएको थियो। बंगलादेश समूह एबाट ४ अंक लिँदै सुपर सिक्समा आएको थियो। जसका कारण यी दुवै टोलीले सुपर सिक्सको पहिलो खेल जित्दै विश्वकप २०२६ मा छनोट भएका हुन्।
इङ्ल्यान्ड्स र वेल्समा संयुक्तरुपमा आयोजना हुने यस प्रतियोगितामा अब ग्लोबल क्वालिफार्यसबाट थप २ टोलीले सहभागीता जनाउनेछन्।
