— भरतपुर महानगरपालिका-१४ राधापुरमा बुधबार साँझ मोटरसाइकल अनियन्त्रित भएर नहरमा खस्दा एकजनाको निधन भएको छ । चितवन जिल्ला प्रहरी कार्यालयका अनुसार उक्त दुर्घटनामा मोटरसाइकल चालक भरतपुर-१६ का ४० वर्षीय विनोद सुवेदीको मृत्यु भएको हो ।
सुवेदीले चलाएको बा प्र ०६-००६ प ७७१२ नम्बरको मोटरसाइकल राधापुर विश्वज्योति बोर्डिङ स्कुल नजिक साँझ आठ बजेतिर नहरमा खसेको थियो । मोटरसाइकल आफै अनियन्त्रित भएर पुलबाट नहरमा खसेको चितवन जिल्ला प्रहरी कार्यालयका प्रवक्ता डीएसपी रविन्द्र खनालले जानकारी दिए । गम्भीर घाइते भएका सुवेदीलाई उपचारका लागि भरतपुरको सरकारी अस्पतालमा भर्ना गरिएको थियो । सुवेदीलाई चिकित्सकले नौ बजेतिर मृत घोषणा गरेको हो ।
