— आगामी प्रतिनिधिसभा निर्वाचनका लागि निर्वाचन प्रहरी भर्नामा चलखेल भएको भन्दै जिल्ला प्रशासन कार्यालय घेराउ गरिएको छ । पहुँचवाला निर्वाचन प्रहरीमा छनोट भएको भन्दै असन्तुष्ट युवाले मंगलबार जिल्ला प्रशासन कार्यालय घेराउ गरेका हुन् ।
जिल्लामा १ हजार ८ सय २६ नेपाल प्रहरी र २ सय सशस्त्र प्रहरीका लागि गरी २ हजार २५ जना निर्वाचन प्रहरीको आवेदन खुलेको थियो । जसमा पुस २५ देखि माघ १ गतेसम्म तोकिएको अवधिमा ४ हजार ४ सय जनाले आवेदन दर्ता गराएका थिए ।
निर्वाचन प्रहरी भर्ना छनोट तथा नियुक्ति समितिले स्वास्थ्य परीक्षण, लिखित र अन्तर्वार्तापछि मंगलबार बिहान अन्तिम नतिजा प्रकाशन गरेको थियो । निर्वाचन प्रहरीको छनोटमा नपरेका असन्तुष्ट युवाले मंगलबार बिहानैदेखि जिल्ला प्रहरी कार्यालयअगाडि छनोट प्रक्रिया पारदर्शी नभई चलखेल भएको भन्दै प्रदर्शन गरेका थिए । असन्तुष्ट युवाहरूको समूह जिल्ला प्रशासनमा प्रवेश गरी निर्वाचन प्रहरी छनोटमा चलखेल भएको भन्दै नाराबाजीसमेत गरेका थिए ।
पहुँचको भरमा निर्वाचन प्रहरी भर्ना गरेकाले प्रदर्शनमा उत्रिएको गुलरिया नगरपालिका–४ का अर्जुन रसाइलीले बताए ।
आफ्नो पहुँच नपुगेर निर्वाचन प्रहरीको छनोटमा नपरेको मैनापोखरकी कविता पुरीले बताइन् । ‘मैले पनि कक्षा १२ पास गरेकी छु, लिखितमा नाम निकालेकै हो,’ उनले भनिन्, ‘अन्तर्वार्तामा नाम, ठेगाना र कति पढेको भनेर सोधिएको थियो । यस्तो प्रश्नको जवाफ पनि बिराएँ हुँला त ?’ पहुँच नपुगेरै निर्वाचन प्रहरी छनोटमा आफू नपरेको उनले दुखेसो पोखिन् ।
निर्वाचन प्रहरीका लागि विगत दुई सातादेखि सम्पूर्ण कामधन्दा छोडेर दौडधुप गरे पनि अन्तिममा पहुँचवालाहरूको नाम निस्किँदा साह्रै दुःखी भएको मधुवन नगरपालिका–७ का पुर्नबहादुर सुनारले बताए ।
निष्पक्ष ढंगले निर्वाचन प्रहरीको छनोट गरिएको प्रमुख जिल्ला अधिकारी गोगनबहादुर हमालले बताए । ‘अन्तिम नजिताप्रति चित्त नबुझेकाहरूलाई निवेदन दिन अनुरोध गरिएको छ,’ उनले भने, ‘निवेदन लिएर आएकाहरूको परीक्षाको कापी पुनः चेकजाँच गरिनेछ ।’
