— स्पेनका कार्लोस अल्कारेजको दाबी छ, आफ्नो खेलमा जहिले पनि सुधार भइरहेको छ । त्यही दाबीमा टिकेर उनले मंगलबार पहिलो पटक अस्टे«लियन ओपन टेनिसको सेमिफाइनल यात्रा तय गरेका छन् । अब त्यहाँ उनको भिडन्त हुनेछ, जर्मनीका एलेक्जान्डर जेभरेजसँग ।
महिलातर्फ एउटा सेमिफाइनलमा भने युक्रेनकी एलिना स्भिटोलिनाले आर्यना सबालेन्काको सामना गर्ने भएको छ । स्पेनी नम्बर एक खेलाडी अल्कारेजले अस्टे«लियाकै एलेक्स डेर मिनरलाई हराएका हुन् । यसक्रममा उनले घरेलु समर्थक जतिलाई निराश पारे । रड लेभर एरिनामा भएको खेलमा २२ वर्षीय अल्कारेज ७–५, ६–२, ६–१ ले विजयी रहे । पहिलो अस्टे«लियन ओपन जित्ने अभियानमा रहेका उनले अहिलेसम्म यसपल्टको प्रतियोगितामा एउटै सेट पनि गुमाएका छैनन् र आफू लयमा रहेको प्रमाणित गरेका छन् ।
जितपछि उनले भने, ‘अहिले मैले जसरी खेलिरहेको छु, त्यसमा आपैm धेरै खुसी छु । मलाई लाग्छ, प्रत्येक चरणपछि मेरो खेलमा सुधार आएको छ ।’ उनको यो भनाइको अर्थ थियो, अरू खेलाडीलाई चेतावनी । उनले थपे, ‘मैले निकै आरामदायी तरिकाले खेलें । यस्तो खेलमा मलाई गर्व पनि छ ।’ त्यसैले उनी पहिलो पटक मेलबर्नमा क्वाटरफाइनल चरण पार गर्नसफल रहे । यो अस्टे«लियन ओपन नै उनले अहिलेसम्म जित्न नसकेको एक मात्र ग्रान्ड स्लाम प्रतियोगिता हो ।
उनले यो उपाधि पनि जित्ने हो भने अल्कारेज आफ्नै देशका राफेल नडालपछि चारै ग्रान्ड स्लाम जित्ने सबैभन्दा कान्छा खेलाडी हुनेछन् । नडालले यस्तै उपाधि चुम्दा उनी २४ वर्षका थिए । अर्को क्वाटरफाइनल खेलमा जेभरेभले भने अमेरिकी युवा खेलाडी लियनर टिएनलाई हराए । जेभरेभले कुल २४ एस प्रहार गर्दै ६–३, ६–७, ६–१, ७–६ को जित निकाले । जितपछि उनले भने, पछिल्लो १२ महिनामा उनी पहिलो पटक विनाकुनै पीडा खेलिरहेका छन् ।
विश्व नम्बर तीन जेभरेभ अहिले २८ वर्ष पुगिसकेका छन्, तर उनले कुनै ग्रान्ड स्लाम जित्न सकेका छैनन् । उनले अहिलेसम्म तीन ग्रान्ड स्लाम फाइनल खेलिसकेका छन्, तर प्रत्येकपल्ट पराजित रहेका छन् । गत वर्ष मेलबर्नमा भएको फाइनलमै पनि उनी च्याम्पियन यानिक सिनरविरुद्धको खेलमा सजिलै पराजित भएका थिए । विम्बल्डनमा हारेयता उनले एक महिनाको आराम पनि लिएका थिए ।
महिलातर्फ अमेरिकी कोको गौफले अविश्वसनीय रूपमा ५९ अनावश्यक गल्ती गर्द स्भिटोलिनाविरुद्धको खेल ६–१, ६–२ ले गुमाइन् । बेलारुसकी नम्बर १ खेलाडी सबालेन्काले भने रड लेभर एरिनामा ३८ डिग्री सेल्सियसबीच अमेरिकाकी इभान जोभिचलाई ६–३, ६–० ले पराजित गरिन् । हारका क्रममा गौफको प्रदर्शन अनुशासित रहेन र उनले खेलपछि आफ्नो ¥याकेट रिसमा बजारिरहेकी थिइन् ।
अब बुधबार क्वाटरफाइनल चरणका खेल सकिनेछ । त्यसमध्ये एउटा खेलमा १० पल्ट मेलबर्नमा च्याम्पियन रहेका नोभाक जोकोभिच कोर्टमा उत्रनेछन् भने अर्कोमा डिफेन्डिङ च्याम्पियन यानिक सिनरले खेल्नेछन् । जोकोभिचले लोरेन्जो मुसेटी र सिनरले बेन सेल्टनको सामना गर्नेछन् । महिलातर्फ जेसिका पेगुला र अमान्डा एनिसिमोभा तथा इगा स्वाटेक र एलेना रेबकिनाबीच खेल हुनेछ । मौसम भने केही चिसो हुने अनुमान छ ।
