: निर्वाचन आयोगले नेपाल कम्युनिष्ट पार्टीका उम्मेदवार शक्तिबहादुर बस्नेतलाई स्पष्टीकरण सोधेको छ। आगामी फागुन २१ गते हुने प्रतिनिधि सभाको निर्वाचनमा मनोनयन दर्ता गर्ने क्रममा बस्नेतले जाजरकोटमा पैसा बाँडेको उजुरी परेको थियो। सोही उजुरीका आधारमा आयोगले बस्नेतलाई स्पष्टीकरण सोधेको हो ।
पाँच सय रुपैयाँका नोट बाँडिरहेको श्रव्यदृश्य सामग्रीसहित उजुरीका आधारमा आयोगले बस्नेतलाई आचारसंहिता उल्लंघन किन गरेको हो ? भन्दै तीन दिनभित्र कारणसहित स्पष्टीकरण पेश गर्न निर्देशन दिएको थियो।
त्यसको जवाफ बस्नेतले आयोगलाई बुझाइसकेका छन्। बस्नेतले आयोगलाई दिएको जवाफमा भनेका छन् कि,'अन्य पार्टीका प्रतिनिधिहरू मनोनयनका क्रममा दमाहा बाजा लिएर आएका थिए र खुसियाली मनाउने तथा शुभकार्यमा दमाहा बजाउने यो जिल्लाको परम्परा हो। मुख्य मानिसले उनीहरूलाई स्वेच्छाले केही दान दिने प्रचलन छ,नदिँदा उनीहरू रिसाउँछन् र अशुभ मानिन्छ। सोही सामाजिक मान्यताअनुसार केही रकम दिएको हुँ। मतदाता प्रभावित पार्न दिएको होइन।'
