: अख्तियार दुरुपयोग अनुसन्धान आयोगले भरतपुर महानगरपालिकाका तत्कालीन वरिष्ठ इन्जिनियर भरतकुमार आचार्यविरुद्ध गैरकानुनी सम्पत्ति आर्जन गरेको अभियोगमा विशेष अदालत काठमाडौंमा आरोपपत्र दायर गरेको छ।
आयोगका अनुसार आचार्यले राष्ट्रसेवक पदमा रहँदा पदीय मर्यादाविपरीत कार्य गरी वैधानिक आयसँग मेल नखाने गरी सम्पत्ति आर्जन गरेको उजुरी परेपछि विस्तृत अनुसन्धान गरिएको थियो।
अनुसन्धानका क्रममा २०४८ साल माघ ६ गतेदेखि २०८० साल असार ६ गतेसम्मको अवधिलाई जाँच अवधि कायम गरी आचार्य र उनको एकाघर परिवारको आय–व्यय विश्लेषण गर्दा कूल वैधानिक आय ३ करोड ५१ लाख ८ हजार २१० रुपैयाँ १८ पैसा देखिएको आयोगले जनाएको छ।
तर सोही अवधिमा जग्गा खरिद,घर निर्माण,सवारी साधन खरिद,बीमा शुल्क, भुक्तानी, लगानी तथा बैंक खातामा रहेको मौज्दातसमेत गरी कूल १० करोड २९ लाख ९९ हजार २२६ रुपैयाँ १२ पैसा खर्च तथा लगानी भएको पाइएको छ।
कूल आयभन्दा कूल व्यय ६ करोड ७८ लाख ९१ हजार १५ रुपैयाँ ९४ बढी देखिएको र उक्त रकम बराबरको सम्पत्तिको स्रोत पुष्टि गर्न आचार्यले सकेनन्। आयोगले आचार्यले वैधानिक आम्दानीको तुलनामा अस्वाभाविक उच्च जीवनस्तर यापन गरेको,सार्वजनिक सेवाको पदमा रहँदा अख्तियारको दुरुपयोग गरी गैरकानुनी रूपमा सम्पत्ति आर्जन गरेको तथा ती सम्पत्तिहरू श्रीमती लिली सुवेदीको नाममा खरिद गरेको पाइएको अख्तियारले जनाएको छ।
अख्तियारले आचार्यविरुद्ध ६ करोड ७८ लाख ९१ हजार १५ रुपैयाँ ९४ पैसा बिगो कायम गरी कैद,जरिवाना र गैरकानुनी सम्पत्ति जफतको मागदाबी लिएको छ। साथै,झुट्टा सम्पत्ति विवरण पेश गरेको अभियोगमा थप सजायको माग पनि गरिएको छ।
त्यसैगरी,गैरकानुनी रूपमा आर्जन गरिएका सम्पत्तिहरू जफत गर्ने प्रयोजनका लागि आचार्यकी श्रीमती सुवेदीलाई समेत प्रतिवादी कायम गरिएको आयोगले जनाएको छ।
