: फागुन २१ गतेका लागि प्रतिनिधिसभा सदस्य बन्नका लागि उम्मेदवार दिएका मध्ये स्याङ्जामा ४ जनाले शुक्रबार उम्मेदवारी फिर्ता लिएका छन्।
दुई निर्वाचन क्षेत्र रहेको स्याङ्जामा क्षेत्र १ बाट एक जना र २ बाट ३ जनाले आ-आफ्नो उम्मेदवारी आफैंले फिर्ता लिएका मुख्य निर्वाचन अधिकृतको कार्यालय स्याङ्जाले जनाएको छ। निर्वाचन क्षेत्र नम्बर १ बाट स्वतन्त्र उम्मेदवारी दिएका आँधीखोला गाउँपालिका मनोज नेपाली दर्जीले आफ्नो उम्मेदवारी फिर्ता लिएका हुन।
दर्जीले औपचारिक रूपमा उम्मेदवारी फिर्ताका लागि निवेदन दिएर फिर्ता लिएको स्याङ्जाका मुख्य निर्वाचन अधिकृत उपेन्द्रप्रसाद गौतमले जानकारी दिए। यसैगरी स्याङ्जा क्षेत्र नम्बर–२ मा प्रगतिशील लोकतान्त्रिक पार्टी (प्रलोपा)का उम्मेदवार टिकाराम रेग्मीसहित स्वतन्त्र उम्मेदवार घनश्याम पाण्डेय र दिलीप श्रेष्ठले पनि आ-आफ्ना उम्मेदवारी फिर्ता लिएका छन्।
उनीहरूले उम्मेदवारी फिर्ता लिएसँगै अब क्षेत्र नं. १ र २ मा १२/१२ जना उम्मेदवारीबीच चुनावी प्रतिस्पर्धा हुने भएको छ। उम्मेदवारी फिर्ता लिने समय शुक्रवार दिउँसो १ बजेसम्म तोकिएको थियो।
