— तीन निर्वाचन क्षेत्र रहेको बाँकेमा विभिन्न राजनीतिक दल र स्वतन्त्रसहित ६० जनाले उम्मेदवारी दर्ता गराएका छन् । क्षेत्र नं १ र ३ मा गरी ३ जना महिलाले उम्मेदवारी दर्ता गराएका छन् । क्षेत्र नं २ मा भने महिला उम्मेदवारी परेको छैन ।
क्षेत्र नं १ मा पूर्व प्रदेश सांसद कृष्णा केसीले उम्मेदवारी दर्ता गराएकी छन् । उनी प्रगतिशील लोकतान्त्रिक पार्टीबाट उम्मेदवार बनेकी हुन् । क्षेत्र नं ३ बाट २ जना महिलाले उम्मेदवारी दिएका छन् ।
जिल्ला निर्वाचन कार्यालयका अनुसार बाँके–१ मा ३ जना स्वतन्त्रसहित १६ जनाको उम्मेदवारी दर्ता भएको छ भने क्षेत्र नं २ मा ३ जना स्वतन्त्रसहित २२ जनाको उम्मेदवारी परेको छ ।
यसैगरी क्षेत्र नं ३ मा ५ जना स्वतन्त्रसहित २२ जनाको उम्मेदवारी दर्ता भएको छ ।
क्षेत्र नं ३ मा उम्मेदवारी दिएका नेपाली कम्युनिस्ट पार्टीका दीपक जीएम र स्वतन्त्र उम्मेदवार सूर्यप्रकाश रेग्मीको उम्मेदवारी ‘पेन्डिङ’मा राखिएको निर्वाचन कार्यालयले जानकारी दिएको छ ।
उनीहरूको नाम आयोगको वेबसाइटमा प्रविष्ट गर्दा कुनै कैफियत देखिएकाले ‘पेन्डिङ’मा राखिएको जिल्ला निर्वाचन कार्यालयका प्रमुख टेकबहादुर शाहीले बताए ।
